میرے خیال میں یہ کہانی سنائی جانی چاہیے: ایشوریہ رائے

فلم کا موضوع گھریلو تشدد ہے اور یہ ایک برطانوی ایشیائی خاتون ،کِرنجیت اہلووالیا‘ کی زندگی پر بنائی گئی ہے۔ اپنے شوہر کو زندہ جلا دینے کے جرم میں کِرنجیت کو انیس سو نواسی میں قید کی سزا دی گئی تھی۔ اس سے قبل وہ شوہر کے ہاتھوں برسوں تشدد کا شکار ہوتی رہی تھیں۔

سابق ’مس ورلڈ‘ ایشوریہ رائے نے پریمیئر کے موقع پر کہا کہ انہوں نے یہ کردار اس لیے لیا ’ کیونکہ ایک عورت ہونے کے ناطے وہ فلم کے سنجیدہ موضوع سے متاثر ہیں۔‘

انڈیا کی سپرسٹار ایشوریہ رائے برطانیہ میں اپنی دو ہزار چار میں ریلیز ہونے والی فلم ’برائیڈ اینڈ پریجیڈس‘ کے حوالے سے بھی جانی جاتی ہیں۔

’پرووکڈ‘ میں ان کے ساتھ کام کرنے والے اداکاروں میں مرنڈا رچرڈسن، روبی کولٹرین اور مشہور ٹی وی اوپرا ’ایسٹ اینڈرز‘ کے اداکار سٹیو میکفاڈن شامل ہیں۔

پرووکڈ ایک برطانوی فلم ہے جو دراصل کِرنجیت اہلووالیا کی خود نوشت سے متاثر ہو کر بنائی گئی ہے۔ اس میں انہوں نے اپنے شوہر کے ہاتھوں دس سال پر محیط جنسی اور جسمانی تشدد کی تفصیلات لکھی ہیں۔

	شاید یہ ایک ایسا معاملہ ہے جس کی مثال آپ کے اپنے گھر یا آپ کے پڑوس میں بھی موجود ہو: ایشوریہ رائے

قتل کا الزام ثابت ہونے پرکِرنجیت کوعمر قید کی سزا دے دی گئی تھی۔

بعد ازاں لندن میں خواتین کے حقوق کی ایک تنظیم ’ساؤتھ ہال بلیک سسسٹرز‘نے اس سزا کے خلاف مہم چلائی جس کے نتیجہ میں انیس سو بانوے میں کرنجیت کی سزا ختم کر دی گئی۔

یہ فیصلہ برطانیہ میں ایک سنگ میل کی حیثیت رکھتا ہے کیونکہ اس کے بعد سے عدالت میں گھریلو تشدد کی شکار خواتین کی زیادہ سنی جانے لگی۔

ایشوریہ رائے کا کہنا تھا ’ میرے خیال میں یہ کہانی سنائی جانی چاہیے کیونکہ یہ لوگوں کی محض خام خیالی ہے کہ گھریلو تشدد کا شکار صرف وہ عورتیں ہوتی ہیں جن میں اعتماد نہیں ہوتا۔‘

سابق مس ورلڈ نے مزید کہا ’ شاید یہ ایک ایسا معاملہ ہے جس کی مثال آپ کے اپنےگھر یا پڑوس میں بھی موجود ہو لیکن اس پر بات نہ کی جاتی ہو۔‘

برطانیہ میں ’پرووکڈ‘ کی نمائش کا آغاز جمعہ چھ مارچ سے ہو رہا ہے۔