ریحانہ بستی والا بی بی سی اردو ڈاٹ کام، ممبئی

	بالی وڈ میں کرینہ اور شاہد کی محبّت کے چرچے ہیں

دراصل کرینہ اور شاہد نے موقع غنیمت جان کر چاہا کہ وہ کچھ وقت ساتھ میں گزار لیں کیونکہ مختلف فلموں کی شوٹنگ کی وجہ سے انہیں وقت ہی نہیں ملتا تھا اس لیئے چپکے سے وہاں سے غائب ہوگئے۔ گھئی نے فورا کرینہ کو سب کے سامنے فون کیا اور ڈانٹا کہ’یہ میری فلم ہے۔ کیا تم لوگوں نے اسے بی گریڈ فلم سمجھ لیا ہے۔ فوراً سیٹ پر واپس آؤ۔‘ سب نے دیکھا تھوڑی ہی دیر میں شاہد اور کرینہ خاموشی سے واپس پہنچے اور صحافیوں کو انٹرویو دیا۔ کیا کریں دنیا ہی پیار کی دشمن ہے۔

شلپا کی پریشانی

	نامور لوگوں کو شہرت کی اس طرح قیمت ادا کرنی پڑتی ہے

شلپا شیٹی بیچاری بہت پریشان ہیں ۔ایک میگزین نے اپنے صفحۂ اول پر ان کی ایک تصویر شائع کی ہے جس کے بارے میں کہا جاتا ہے کہ وہ فحش ہے اور اسی لیئے برہنگی کے معاملہ میں ان کے خلاف ایک عدالت نے غیر ضمانتی وارنٹ جاری کر دیا ہے۔

لوگوں سے خفا شلپا کا کہنا ہے کہ واقعی نامور لوگوں کو ان کی شہرت کی اس طرح قیمت ادا کرنی ہوتی ہے کہ جب جس کا جی چاہا ان کے خلاف یا تو کیس کر دیتا ہے یا پھر انہیں نصیحتیں کرنے لگتا ہے۔ شلپا کو تو یاد بھی نہیں کہ ان کی کون سی تصویر فحش تھی یا وہ کس لباس میں برہنہ نظر آرہی تھیں۔ ہمیں بھی حیرت ہے کہ شلپا نے کب برہنگی کا مظاہرہ کیا ۔خیر شلپا کوئی بات نہیں آج کا دور ہی جسم کی نمائش کا ہے ۔ایسے نہ سہی ویسے ہی آپ کو اب فلمیں ملنی شروع ہو جائیں گی۔

ایش کے بولڈ سِین

	ایشوریہ رائے فلم’مسٹریس آف اسپائسز‘ میں

نیلی آنکھوں والی ایشوریہ رائے کے حسن کے تو دنیا بھر میں چرچے ہیں لیکن ان کی فلمیں باکس آفس پر نہیں چلتیں۔ انہوں نے غیرملکی فلمیں کیں لیکن اس میں بھی کمال نہیں کر سکیں۔اب سنا گیا ہے کہ گریندر چڈھا کے شوہر پاؤل مائدا برگیز کی ہدایت میں بننے والی پہلی فلم’مسٹریس آف اسپائسز‘ میں انہوں نے کچھ بہت ہی بولڈ سین کیئے ہیں اور اب وہ نہیں چاہتیں کہ ابھیشیک ان مناظر کو دیکھیں۔ اس لیئے وہ فلم کی تشہیری مہم میں بھی حصہ نہیں لے رہیں۔ یہ فلمساز کی سب سے بڑی مصیبت ہے کیونکہ پبلسٹی نہیں ہوگی تو فلم کون خریدے گا۔’ایش بےبی‘ ایسا ہی تھا تو سین کرتے وقت سوچ لیتیں ۔

مدھر بھنڈارکر کا ’سگنل‘
قومی ایوارڈ یافتہ فلمساز مدھر بھنڈارکر زندگی سے قریب کہانیوں پر فلمیں بناتے ہیں۔ تجارتی اور دفتری زندگی کی کڑوی سچائیوں پر مبنی فلم’ کارپوریٹ‘ کے بعد سنا ہے وہ اب’سگنل‘ نامی فلم بنا رہے ہیں۔ اس فلم کو حقیقی رنگ دینے کے لیئے انہوں نے اصل زندگی میں بھی ٹریفک سگنل پر سامان فروخت کرنے والوں کے آڈیشن کے لیئے بلایا اور ایک لڑکی کو بطور ہیروئن منتخب بھی کر لیا۔ اس فلم کے ہیرو کنال کھیمو ہیں اور وہ بھی اپنی اداکاری میں حقیقت کا رنگ بھرنے کے لئے روز ٹریفک سگنل پر جاتے ہیں اور میلے کچیلے بچوں، اخبار فروخت کرتے لڑکوں اور گجرا بیچتی لڑکیوں سے گھل مل کر باتیں کرتے ہیں تاکہ ان کی صحیح زندگی کو سمجھ سکیں ۔

آٹھ ہزار کی’سرخ مرچ‘

	عامر خان فلم ’فنا‘ میں کشمیری جہادی بنے ہیں

عامر خان کی آنے والی فلم’فنا‘میں انہوں نے ایک کشمیری جہادی کا کردار نبھایا ہے۔ فلم کے لیئے کپڑے تو دبئی کی سڑکوں سے خریدے گئے کیونکہ فلم میں عامر کے کردار کا مطالبہ تھا۔ کردار کی ضرورت کے پیشِ نظر ہدایت کار کنال کوہلی نے عامر کو ایک لاکٹ بھی دیا ہے جس کا پینڈنٹ سرخ مرچی ہے۔ ہمیں لگا کپڑوں کی طرح یہ بھی سستا سا ہوگا لیکن پتہ ہے اس کی قیمت کیا ہے ؟آٹھ ہزار روپے ! اب دیکھنا یہ ہے کہ یہ کتنے نوجوانوں کے گلے کی زینت بنتا ہے ۔