سنہ دو ہزار ایک میں انہیں ملک کے اعلی ترین اعزاز ’ بھارت رتن‘ سے نوازا گیا تھا۔

استاد بسم اللہ خان انتقال کرگئے

استاد بسم اللہ خان سے قبل شہنائی صرف شادی بیاہ کی تقریبات اور مندروں تک ہی محدود تھی لیکن انہوں نے شہنائی کو ستار، سرود، اور تبلے جیسے موسیقی کے سازوں کےدرجےتک پہنچا دیا۔

موسیقی کی دنیا میں اہم کردار ادا کرنے کے اعتراف کرتے ہوئے حکومت نےانہیں سنہ دو ہزار ایک میں ملک کے اعلیٰ ترین باشندے کے اعزاز’ بھارت رتن‘ سے نوازا تھا۔

خان صاحب کی پیدائش 21 مارچ انیس سوسولہ کو بہار کے ڈم راؤں ضلع میں ہوئی تھی۔ بچپن سے ہی موسیقی میں دلچسپی رکھنے والے بسم اللہ خان نے اپنے ماموں علی بحش سےشہنائی بجانے کی تعلیم حاصل کی۔ بعد میں بسم اللہ خان ان کے ساتھ کاشی کے وشوناتھ مندر میں شہنائی بجانےلگے۔

خان صاحب موسیقی کو ہی اپنا مذہب مانتے تھے اور بنارس کےگھاٹوں پر گھنٹوں تک ریاض کر تے۔ ہر برس بنارس میں گنگا کنارے محّرم کی آٹھويں تاریخ کو بسم اللہ خان کی شہنائی سننے تقریباً سبھی مذاہب کے ماننے والے آتے تھے۔

اپنے آپ کو شیعہ کہنے والے بسم اللہ خان ہندو مذہب میں موسیقی اور تعلیم کی دیوی ’سرسوتی‘ کی پوجا بھی کرتے تھے۔

استاد بسم اللہ خان نے ہی پندرہ اگست انیس سو سینتالیس کی نصف شب لال قلعہ میں شہنائی بجاکر ہندوستان کی آزادی کا خیر مقدم کیا تھا۔

اعلیٰ درجے کے شہنائی نواز ہونے کے ساتھ ساتھ استاد بسم اللہ خان اپنی سادگی کے لیئے بھی کافی مشہور تھے۔موسیقار کے طور پر انہوں نے جو کچھ بھی کمایا اسے یا تواپنے لواحقین پر خرچ کر دیا اور یا غریبوں کی مدد میں۔ اسی کے سبب ان کی زندگی میں ایک دور ایسا بھی آیا کہ وہ پائی پائی کے لیئے محتاج ہوگئے۔اس وقت ریاستی حکومت نے انہیں مالی مدد فراہم کی۔

ایک عرصے سے بیمار استاد بسم اللہ کی آخری خواہش تھی کہ وہ دلّی کے انڈيا گیٹ پر شہنائی بجائيں لیکن ان کی یہ خواہش ادھوری رہ گئی۔