راجیو کھنہ بی بی سی اردو ڈاٹ کام،احمدآباد

	سلمان خان کو فروری میں ایک سال قید کی سزا سنائی جا چکی ہے

اس مقدمے میں سلمان پر الزام لگایا گیا ہے کہ انہوں نے اپنے دو ساتھیوں سمیت سنہ 1998 میں کچھ کے علاقے میں دو چنکارا شکار کیئے تھے۔ سلمان خان اس زمانے میں کچھ کے علاقے میں اپنی سپر ہٹ فلم ’ہم دل دے چکے صنم‘ کی شوٹنگ میں مصروف تھے۔

آٹھ برس قبل اس مقدمے کی تفتیش ریاست کے محکمۂ جنگلات کے حکام نے کی تھی اور ٹھوس ثبوت کی عدم دستیابی کی بنیاد پر یہ کیس داخل دفتر کر دیا تھا۔ گجرات پولیس کا کہنا ہے کہ انہوں نے اس کیس کی ازسرِ نو تفتیش کا فیصلہ ایک ماحولیاتی کلب کی جانب سے دی جانے والی درخواست کے بعد کیا ہے۔

یاد رہے کہ اس برس فروری میں سلمان خان کو جودھپور کی ایک عدالت غیر قانونی شکار کے جرم میں ایک برس قید کی سزا سنا چکی ہے اور چند روز قبل ہی ان پر ریاست راجھستان کی ہی ایک اور عدالت میں ان پر چند دیگر اداکاروں اور اداکاراؤں کے ہمراہ غیر قانونی شکار کے مقدمے میں ہی فردِ جرم بھی عائد کی گئی ہے۔