سیف اللہ لاہور

	بطور فلمساز اور ہدایتکارہ ریما کی یہ پہلی فلم ہے۔

دوسری طرف پاکستان کی فلمی تنظیمیں گزشتہ چند برسوں سے سینما گھروں میں بھارتی فلموں کی نمائش کے لیے کوششیں کر رہی ہیں۔ سال دو ہزار پانچ میں بھی اس حوالے سے کوششیں عروج پر رہیں مگر کچھ حاصل نہ ہوا اور یہ سال بھی بھارتی فلموں کی نمائش کے لیے حکومتی اجازت نامے کے انتظار میں ہی گزر گیا۔اس سلسلے میں پہلی کوشش ایشوریا رائے کی فلم’برائیڈ اینڈ پریجوڈس‘ کی نمائش کے لیے کی گئی جو تمام تر کوششوں کے باوجود کامیاب نہ ہو سکی۔

اس کے بعد فلم ’مغلِ اعظم‘ کی نمائش کے حوالے سے خبریں آنا شروع ہو گئیں- حتیٰ کہ ایک خبر میں صدر پرویز مشرف کی طرف سے بھی اس فلم کی نمائش کے لیے رضامندی ظاہر کی گئی مگر سال کے اختتام تک ’مغلِ اعظم‘ کی بھی نمائش کی اجازت نہ مل سکی۔ وفاقی وزیر اطلاعات شیخ رشید احمد کی طرف سے سارا سال بھارتی فلموں کی نمائش کے حوالے سے متضاد بیانات آتے رہے۔

	نیہا دھوپیا اور معمر رانا

پاکستان کی فلمی تنظیمیں لالی وڈ کی بقا کا راز بھارتی فلموں کی نمائش میں تلاش کر رہی ہیں۔ اس نظریے اور سوچ کے سب سے بڑے حامی پاکستان فلم ایگزیبیٹرز ایسوسی ایشن کے سابق چیئرمین ضوریز لاشاری کا کہنا ہے کہ سال دوہزار پانچ میں بھارتی فلموں کی نمائش کے لیے بہت کوششیں ہوئیں جن میں ایک بڑی کوشش وزیراعظم سے ملاقات تھی۔

یہ بات باعث حیرت ہے کہ سینما میں تو بھارتی فلموں کی نمائش کی اجازت نہیں دی گئی مگر کارا فلم فیسٹیول میں بھارتی فلمیں دکھائی گئیں جس میں صدر پرویز مشرف مہمان خصوصی تھے۔ اس دوہرے معیار پر فلم انڈسٹری کو سخت مایوسی ہوئی۔

	’مغلِ اعظم‘ کی بھی نمائش کی اجازت نہ مل سکی۔

اگرچہ سال دو ہزار پانچ کے دوران بھارتی فلموں کی نمائش اجازت تو نہ مل سکی تاہم دونوں ملکوں کی فلمی شخصیات کا آنا جانا لگارہا۔ کچھ پاکستانی فنکاروں نے بھارتی فلموں میں کام کیا اور کچھ بھارتی فنکاروں نے پاکستان میں۔ کراچی میں دو دفعہ کارا فیسٹیول ہوا جس میں مہیش بھٹ، پوجا بھٹ، اوم پوری، عرفان خان اور انوپم کھیر شریک ہوئے۔ اداکارہ’کم کم‘ دو دفعہ پاکستان آئیں ایک دفعہ ٹی وی ڈرامے کی ریکارڈنگ کے لیے کراچی اور دوسری دفعہ لاہور میں ایک تاجر کی بیٹی کی سالگرہ میں شرکت کے لیے۔ نصیرالدین شاہ شعیب منصور کی فلم ’خدا کے لیے‘ کی عکسبندی کے لیے آئے۔ شترو گن سنہا اس سال تین بار پاکستان آئے۔ سبھاش گئی بھی آئے۔ راج ببر جہانگیر بدر کی کتاب کی تقریب رونمائی میں شریک ہوئے۔ ملائکہ اروڑہ اور امریتا اروڑہ نے لاہور میں ایک شادی میں پرفارم کیا۔ قطرینہ کیف اور یانا گپتا دو دفعہ لاہور آئیں ایک دفعہ شادی کی تقریب میں اور دوسری دفعہ فورٹریس سٹیڈیم میں شو میں پرفارم کرنے کے لیے۔ اس شو میں سیف علی خان نے بھی شرکت کی مگر ورک پرمٹ نہ ہونے کی وجہ سے پرفارم نہ کر سکے۔ عامرخان شوکت خانم کی فنڈ ریزنگ کے لیے ڈنر میں شرکت کے لیے آئے۔

پاکستان سے جوفلمی شخصیات بھارت گئیں ان میں میرا، ثنا، شہزاد رفیق، جاوید شیخ، سیدنوراور جاوید رضا شامل ہیں۔ میرا نے اس سال دو بھارتی فلموں ’نظر‘ اور ’کسک‘ میں کام کیا۔ ثنا بھارتی فلم ’قافلہ‘ میں کام کر رہی ہیں۔ جاوید رضا نے اپنی فلم کا ایک گانا نیہا دھوپیا پر عکسبند کیا۔

اس سال لالی ووڈ کی کچھ شخصیات دنیا سے رخصت ہو گئیں ان میں موسیقار امجد بوبی، اداکار رنگیلا، خلیفہ نذیر اور گلوکار پرویز مہدی شامل ہیں۔