امیتابھ بچن اور رانی مکھر جی نے اس فلم میں مرکزی کردار ادا کیے

بالی وڈ کے ہدایتکار سنجے لیلا بھنسالی کی اس فلم میں ایک بہری اور نابینا لڑکی اور اس کے استاد کی کہانی کو بیان کیا گیا ہے اور یہ فلم درجہ بندی میں پانچویں نمبر پر رہی۔

اس فلم کے بارے میں ٹائم میگزین کا کہنا ہے کہ ’یہ فلم صرف رلاتی ہی نہیں بلکہ یہ بالی وڈ کی مکمل تصویر ہے‘۔

ٹائم میگزین نے ’بلیک‘ کو سنہ 1962 کی امریکی فلم ’دا میریکل ورکر‘ کا ’ان آفیشل ری میک‘ قرار دیا ہے۔ اس فلم میں ہیلن کیلر اور ان کی استاد اینی سیلیون کی کہانی بیان کی گئی تھی۔

فلمی ناقد رچرڈ کارلس نے اپنے مضمون میں اس فلم کو ایک غیر معمولی فلم قرار دیا ہے اور کہا ہے کہ’ گانوں کی غیر موجودگی، دو گھنٹے سے بھی کم کی طوالت اور زیادہ تر مکالموں کے انگریزی زبان میں ہونے کے باوجود یہ فلم ایک بڑی ہٹ رہی‘۔

فلم کے ہدایتکار سنجے لیلا بھنسالی کا کہنا ہے کہ ’یہ بھارتی سنیما، میری تمام کاسٹ اور عملے کی بہت بڑی فتح ہے‘۔

انہوں نے کہا کہ ’ ’بلیک‘ ایک لڑکی اور اس کے استاد کی محبت کی داستان ہے وہ دونوں ایک دوسرے کو جینے کا طریقہ سکھاتے ہیں۔’ بلیک‘ کو ایک رومانوی کہانی قرار دینا اس فلم کی صحیح تعریف ہے‘۔

سنجے لیلا بھنسالی کی اس فلم میں بھارتی فلم انڈسٹری کے سپر سٹار امیتابھ بچن اور رانی مکھر جی نے مرکزی کردار ادا کیے تھے۔