سنہ 2015 کی ناکام بھارتی فلمیں

بھارت کے فلمی مبصرین مينك شیکھر اور امود مہرا نے رواں سال ناکام ہونے والی بڑے بجٹ کی فلموں کے حوالے سے بی بی سی ہندی سے بات چیت کی۔

بھارت میں رواں سال کی ابتدا ارجن کپور، سوناکشی سنہا اور منوج واجپئی کی فلم ’تیور‘ سے ہوئی۔ اس فلم میں سلمان کے مداحوں کو آمادہ کرنے کے لیے ایک گانا ’میں تو سلمان کا فین‘ بھی شامل کیا گیا تاہم اس کے باوجود یہ فلم ناکام رہی۔ تقریبا 40 کروڑ کے بجٹ والی یہ فلم باکس آفس پر بھارت میں تقریبا 39 کروڑ کا بزنس ہی کر پائی۔

فروری میں ریلیز ہونے والی فلم ’رائے‘ میں اہم اداکار ارجن رامپال اور اداکارہ جیکلن فرنانڈیز تھیں۔ اس فلم میں رنبیر کپور نے بھی چھوٹا سا رول ادا کیا تھا۔ فلم کی تشہیر اس طرح کی گئی جیسے رنبیر بھی اس کا حصہ ہیں۔ فلم کو نہ مبصرین نے سراہا اور نہ ہی مداحوں نے۔ اچھی اوپننگ ملنے کے باوجود 40 کروڑ کی لاگت میں بننے والی یہ فلم 58 کروڑ ہی کما سکی۔

فروری میں ہی ریلیز ہونے والی ایک اور فلم ’شمیتابھ‘ کو امیتابھ بچن کی آواز کے لیے ٹریبيوٹ مانا جا رہا تھا لیکن یہ فلم باکس آفس پر کوئی ٹریبيوٹ نہیں دے پائی اور باکس آفس پر اس فلم کی کمائی 22.46 کروڑ ہی رہی۔

ڈائریکٹر دباكر بینرجی کی اپریل میں ریلیز ہونے والی فلم ڈیٹکٹیو بيوم كیش بخشی‘ کی انڈسٹری کے اندر اور باہر خاصی بحث تھی مگر اسے بھی ناظرین نہیں ملے۔ 35 کروڑ کی لاگت سے بننے والی یہ فلم ملک بھر میں تقریباً 32 کروڑ کما کر اپنے اخراجات بھی پورے نہ کر سکی۔

مئی میں ریلیز ہونے والی ’بامبے ویلویٹ‘سال کی سب سے مشہور فلموں میں ایک تھی لیکن یہ سال کی سب سے ناکام فلموں میں سے ایک ثابت ہوئی۔ رنبیر کپور اور انوشکا شرما کی اداکاری والی اس فلم میں کرن جوہر پہلی بار ولن کے کردار میں نظر آئے۔

ہدایت کار انو راگ کشیپ کی یہ فلم 120 کروڑ کی لاگت کے مقابلے میں باکس آفس پر 30 کروڑ بھی نہیں کما سکی۔ اس فلم کی ناکامی کا اندازہ اس بات سے لگایا جا سکتا ہے کہ ناظرین کی کمی کی وجہ سے اس کے بہت سے شو منسوخ کرنے پڑے۔

بالی وڈ کے دبنگ یعنی سلمان خان نے اس سال آدیتہ پنچولی کے بیٹے سورج پنچولی اور سنیل شیٹی کی بیٹی عطیہ شیٹی کو لانچ کرنے کا بیٹرا اٹھایا تاہم یہ لانچنگ ناکام رہی۔

سنہ 1983 میں ریلیز ہونے والی مشہور فلم ’ہیرو‘ کے اس ری میک میں مرکزی کردار آدتیہ پنچولی کے بیٹے سورج پنچولی اور سنیل شیٹی کی بیٹی عطیہ نے نبھایا لیکن جہاں فلم مبصرین نے ان اداکاری کی صلاحیت پر سوال اٹھایا وہیں ناظرین نے بھی اسے مسترد کردیا۔

اگرچہ اس فلم کی تشہیر کے لیے سلمان خان نے پورا زور لگایا اور فلم کے ٹکٹ خریدنے والوں سے ملنے کا وعدہ بھی کیا لیکن ناظرین کو فلم پسند نہیں آئی۔

سابق ملکۂ حسن ایشوریہ رائے بچن کی واپسی کی وجہ سے بحث میں رہنے والی فلم ’جذبہ‘ بھی باکس آفس پر کوئی کمال نہیں دکھا پائی اور 30 کروڑ کی لاگت سے بننے والی اس فلم نے باکس آفس پر 33 کروڑ کمانے کے بعد دم توڑ دیا۔

’کوئن‘ جیسی سپر ہٹ فلم بنانے والے ڈائریکٹر وکاس بہل کی فلم ’شاندار‘ بھی رواں برس کی ناکام فلموں میں شامل رہی۔ شاہد کپور، پنكج کپور اور عالیہ بھٹ جیسے نام بھی اس فلم کو باکس آفس پر رنگ جمانے میں ناکام رہے۔

ودیا بالن کی فلم ’ہماری ادھوری کہانی‘ کنگنا راناوت کی ’کٹی بٹی‘ اور ابھیشیک بچن کی سولو فلم ’آل از ویل‘ بھی ناکام ثابت ہوئی۔