ہارون رشید بی بی سی اردو ڈاٹ کام، اسلام آباد

	ملکی تاریخ میں سب سے زیادہ ووٹ انیس سو ستر کے انتخابات میں پڑے تھے

سیکرٹری الیکشن کمیشن کنور دلشاد نے صحافیوں کو بریفنگ دیتے ہوئے بتایا کہ اس کی بڑی وجہ ذرائع ابلاغ کا کردار ہے جس نے لوگوں کو بڑی تعداد میں ووٹ ڈالنے پر مجبور کیا اور لوگ کود پڑے۔

الیکشن کمیشن کے اعدادوشمار کے مطابق اٹھارہ فروری کو 45 عشاریہ 67 فیصد ووٹ پڑے جبکہ انیس سو نوے میں ووٹ ڈالنے کی شرح 45 اعشاریہ 46 فیصد تھی۔

ملکی تاریخ میں سب سے زیادہ ووٹ انیس سو ستر کے انتخابات میں پڑے تھے جب 57 عشاریہ 96 فیصد ووٹ ڈالے گئے تھے۔ اس کے بعد سے ووٹ ڈالنے کی شرح میں کمی ہوتی رہی ہے۔

سال دو ہزار پانچ کے بلدیاتی انتخابات میں عوامی شرکت قدرے زیادہ ہوتی تھی، لہذا ووٹر ٹرن آوٹ سینتالیس فیصد رہا تھا۔

سیاسی پنڈتوں کے خدشات  سیاسی پنڈتوں کو خدشہ تھا کہ امن عامہ کی مخدوش صورتحال اور سیاسی عمل سے بےزاری دو ایسی بڑی وجوہات ہیں جن کی بنیاد پر ووٹروں کی بڑی تعداد شاید پولنگ سٹیشنوں کا رخ نہ کرے

سیاسی پنڈتوں کو خدشہ تھا کہ امن عامہ کی مخدوش صورتحال اور سیاسی عمل سے بےزاری دو ایسی بڑی وجوہات ہیں جن کی بنیاد پر ووٹروں کی بڑی تعداد شاید پولنگ سٹیشنوں کا رخ نہ کرے۔

آل پارٹیز ڈیموکریٹک موومنٹ کی بائیکاٹ مہم کا اثر بھی ووٹر ٹرن آوٹ پر ہونے کا امکان موجود تھا۔ اے پی ڈی ایم اور وکلاء مہم کی وجہ سے بائیکاٹ کا زیادہ اثر بلوچستان میں دیکھا گیا ہے۔

انتخابی کمیشن کے سیکرٹری کے مطابق بلوچستان میں ہمیشہ ووٹر کم تعداد میں پولنگ سٹیشن گئے ہیں۔ انہوں نے یاد دلایا کہ انیس سو ستانوے میں بلوچستان میں صرف پانچ فیصد ووٹ پڑے تھے تاہم اس مرتبہ یہ تعداد 31 عشاریہ 44 فیصد رہا۔ ان کا کہنا تھا کہ یہ تعداد مزید بڑھ بھی سکتی ہے کیونکہ چھ حلقوں میں ابھی گنتی جاری ہے۔

انہوں نے اس موقع پر کہا کہ کمیشن نے انتخابات منعقد کروا کر اپنی ذمہ داری پوری کر دی ہے۔ انہوں نے انتخابی عملے کا بھی شکریہ ادا کیا اور تعریف کی۔ کنور دلشاد نے امید ظاہر کی کے ان انتخابات کے نتیجے میں ملک میں جمہوریت مضبوط ہوگی۔