వడ్లూరు: ఉషా చిలుకూరి పూర్వీకుల స్వగ్రామం ఇదే.. ‘బీబీసీ తెలుగు’ అక్కడ పర్యటించినప్పుడు ఏం తెలిసిందంటే..

చెన్నై- కోల్‌కతాను కలిపే పాత జాతీయ రహదారిలో విజయవాడ నుంచి విశాఖ వైపు వెళ్తూంటే తణుకు పట్టణం రావడానికి 3 కిలోమీటర్ల ముందు (లేదా తాడేపల్లి గూడెం దాటాక 15 కిలో మీటర్ల తరువాత) ఎడమ వైపు ఉన్న రోడ్డులో 3 కిలో మీటర్ల దూరం ప్రయాణిస్తే వడ్లూరు గ్రామం వస్తుంది.

అమెరికా అధ్యక్ష ఎన్నికల్లో రిపబ్లికన్‌ పార్టీ ఉపాధ్యక్ష అభ్యర్థి జేడీ వాన్స్ భార్య ఉషా చిలుకూరి పూర్వీకుల గ్రామం గోదావరి కాలువను ఆనుకుని ఉండే ఈ ఆకుపచ్చటి వడ్లూరే.

5 వేల జనాభా ఉండే వడ్లూరు మౌలికవసతులతో, వరి పంటలతో కళకళలాడుతూ ఉంటుంది. కొబ్బరి తోటలు కూడా కనిపిస్తుంటాయి.

గ్రామం మధ్యలో నుంచి వెళ్లే తారు రోడ్డు, రోడ్డుకు రెండు వైపులా ఉన్న పాత – కొత్త ఇళ్లు, కాస్త ఇరుకుగా ఉండే సందులో పెద్ద పెద్ద ప్రాంగాణల్లో కట్టుకున్న ఇళ్లతో సందడిగా కనిపిస్తుంది ఈ ఊరు.

వాస్తవానికి గ్రామంలో ఎవరికీ ఉషా చిలుకూరి గురించి, అమెరికా అధ్యక్ష ఎన్నికల గురించి పెద్దగా తెలియదు.

దానికి తోడు చిలుకూరి ఇంటి పేరుతో ఇప్పుడు ఆ గ్రామంలో ఎవరూ లేకపోవడంతో, వారి బంధువుల గురించి కూడా తెలియదు.

చిలుకూరి కుటుంబం ఈ గ్రామంలో నివసించినట్టు కొందరు గ్రామస్తుల ద్వారా తెలుస్తోంది.

వారికి చిలుకూరి కుటుంబంతో ఉన్న అనుబంధాన్ని గుర్తు చేసుకోవడానికి ప్రయత్నించారు.

ఆలయ నిర్మాణానికి భూదానం

ఆ గ్రామానికి చెందిన ఆడిటర్ పెన్మెత్స చలపతి రాజుకు, ఉషా చిన్న తాత.. అంటే ఉషా తాత తమ్ముడు సుబ్రమణ్య శాస్త్రితో స్నేహం ఉండేది. విశాఖకు చెందిన ప్రొఫెసర్ శాంతమ్మ భర్తే సుబ్రమణ్య శాస్త్రి.

‘గ్రామంలోని చిలుకూరి కుటుంబానికి చెందిన కొంత భూమిని సాయిబాబా గుడికి దానం ఇచ్చారు సుబ్రమణ్య శాస్త్రి. ఆ స్థలంలో మా తాత గారు పెన్మెత్స చలపతిరాజు సాయిబాబా గుడి కట్టించారు. ఆ భూమి చిలుకూరి వారు ఇచ్చారు అన్నంత వరకూ నాకు తెలుసు. ఆ చిలుకూరి వారి కుటుంబం మొత్తం చదువులు, ఉద్యోగాల నిమిత్తం గ్రామం వదిలి వెళ్లిపోయారు. ఆ కుటుంబంలో సుబ్రమణ్య శాస్త్రితో తప్ప ఇతరులతో మాకు పరిచయం లేదు’ అని చెప్పారు శ్రీనుబాబుగా పరిచితులైన గ్రామ మాజీ ప్రెసిడెంట్ పెన్మెత్స శ్రీనివాస రాజు.

‘‘సుబ్రహ్మణ్యశాస్త్రి అన్న మనవరాలు ఈ ఉషా చిలుకూరి అని, వారి కుటుంబం మొత్తం యూఎస్ లో స్థిరపడిందని తెలుస్తోంది. ఈ ఊరి ఆడపడచు కుటుంబం అమెరికా రాజకీయాల్లో పాత్ర పోషించడం సంతోషకరం. రామ శాస్త్రి వాళ్ళు ఐదుగురు అన్నదమ్ములు, ఒక తోబుట్టువు ఉన్నారని తెలుసు. ఈ ఉషా చిలుకూరి వల్ల మా ఊరి గురించి ఇప్పుడు ప్రపంచం మొత్తానికి తెలుస్తోంది. అగ్రరాజ్యంలో మా ఆడపడుచు రాజకీయంగా చురుకైన పాత్ర పోషించడం అంటే ఆవిడకు ఎంతో సామర్థ్యం ఉండి ఉండాలి. ఇది మాకెంతో సంతోషం. గ్రామస్తుల తరపున ఆల్ ది బెస్ట్’’ అని శ్రీనుబాబు చెప్పారు.

‘చిలుకూరి వారి వీధి ఉండేది’

తమకూ, ఉషా చిలుకూరి తాత రామశాస్త్రి కుటుంబానికి బంధుత్వం ఉన్నట్టు గ్రామానికి చెందిన ఓ బ్రాహ్మణ కుటుంబం తెలిపింది.

అయితే వాళ్లకు కూడా అమెరికా అధ్యక్ష ఎన్నికల వ్యవహారం తెలియదు.

ఉషా చిలుకూరి గురించి కానీ, అసలు రామ శాస్త్రి పిల్లలు, మనువళ్ల గురించి కానీ ఏమీ తెలియదు.

అయితే చిలుకూరి రామ శాస్త్రి తమకు బంధువు అన్నది మాత్రం వారు స్పష్టంగా చెప్పగలిగారు.

రామ శాస్త్రి, సుబ్రమణ్య శాస్త్రి ఇతర సోదరుల కుటుంబాలు కొన్ని హైదరాబాద్, బెంగళూరులో ఉన్నట్టు వారు చెప్పారు.

"నాకు ప్రత్యక్షంగా చిలుకూరి కుటుంబంతో పరిచయం లేదు. కానీ చిలుకూరి రామశాస్త్రి కుటుంబీకులు గుడికి స్థలం ఇచ్చారని తెలుసు. వాళ్లది పెద్ద కుటుంబం. నాకు 60 ఏళ్లు దాటాయి. నేను పుట్టేసరికే వారెవరూ ఈ ఊరిలో లేరు. చిలుకూరి వారు ఈ ఊరిలో ఉండడం ఇక్కడ ఎవరికీ తెలియదు. ఆ తరం వారు ఎవరూ లేరు. నాకు శ్రీను బాబు గారు చెప్పగా ఉష గారి విషయం తెలిసింది. ఆవిడ భర్త అమెరికా రాజకీయాల్లో పోటీ చేస్తున్నారని తెలిసింది. వారు ఇంకా పై స్థాయికి వెళ్ళాలని ఆశిస్తున్నాను" అన్నారు వడ్లూరుకు చెందిన వడ్లూరి బదరీ నారాయణ.

వడ్లూరులోని సాయిబాబా గుడి ఉన్న వీధికి ఒకప్పుడు చిలుకూరివారి వీధి అనే పేరు ఉండేదనీ, కాలక్రమంలో ఆ బోర్డు కనుమరుగు అయిందని ఒక మహిళ చెప్పారు.

చిలుకూరి వర్ధనమ్మ అనే మహిళ వడ్లూరు గ్రామంలోని సోమేశ్వరాలయంలో పార్వతీదేవి ప్రతిష్ఠ చేయించినట్టుగా సోమేశ్వరాలయ అర్చక కుటుంబ సభ్యులు తెలిపారు. అంతకుమించి ఆ కుటుంబ వివరాలు వారికీ తెలియదు.

వడ్లూరు గ్రామానికి 30 కిలోమీటర్ల దూరంలో పశ్చిమ గోదావరి జిల్లా నిడదవోలు దగ్గరలో చాగల్లు మండలం పరిధిలోని మార్కొండపాడు గ్రామంలో కూడా చిలుకూరి కుటుంబీకులు ఉన్నారు.

ఉష తాతయ్య రామశాస్త్రికీ, ఆయన తండ్రి వీరావధానులకీ ఈ గ్రామంతో కూడా అనుబంధం ఉండేది. రామశాస్త్రి తమ గ్రామం వచ్చి తరచూ తమను కలుస్తుండే వారని మార్కొండపాడులోని చిలుకూరి శ్రీపతి శాస్త్రి బీబీసీతో చెప్పారు.

రామశాస్త్రి, ఆయన సోదరులు, ఆయన తల్లితండ్రులు వీరావధాన్లు, సూరమ్మలతో తమ కుటుంబాలతో ఉన్న అనుబంధాన్ని గుర్తు చేసుకున్నారు.

ఉష చిలుకూరి యూఎస్ రాజకీయాల్లోకి వెళ్లిన విషయం తమ బంధువుల ద్వారా తెలిసిందని శ్రీపతి శాస్త్రి చెప్పారు. అయితే రామశాస్త్రి పిల్లలు, మనుమలతో తమకు ప్రత్యక్ష పరిచయం లేదని వారంతా అమెరికాలో స్థిరపడ్డారని ఆయన చెప్పారు.

‘‘ఇంట్లో అందరికీ ఇష్టమైన అమ్మాయి’’

‘‘ఉషా ఇంట్లో అందరికీ ఇష్టమైన అమ్మాయి.’’ అని బీబీసీతో చెప్పారు ఆమె మేనత్త శారద. ట్రంప్ తన పార్టీ ఉపాధ్యక్ష అభ్యర్థి పేరు ప్రకటించినప్పటి నుంచీ ఉషా కుటుంబం గురించి అందరూ ఆరా తీస్తున్నారు.

ఉషా తల్లితండ్రులు అమెరికా వెళ్లి స్థిరపడ్డారు. ఆవిడ అక్కడే పుట్టారు.

ఆమె తాతది ఆంధ్ర రాష్ట్రంలోని తణుకు దగ్గర వడ్లూరు కాగా, ఆయన చెన్నై వెళ్లి అక్కడే స్థిరపడ్డారు. ప్రస్తుతం ఉషా మేనత్త చెన్నైలోనే నివసిస్తున్నారు.

ఉషా చిన్న తాత కుటుంబ సభ్యులు విశాఖపట్నంలో నివసిస్తున్నారు.

చెన్నైలో వైద్యురాలిగా ఉన్న ఉషా మేనత్త శారద, బీబీసీతో మాట్లాడారు.

శారదకు ఉషాతో చాలా జ్ఞాపకాలు ఉన్నాయి. ‘‘ఉషా అందరికి ఇష్టమైన అమ్మాయి. తెలివైనది. ఏ విషయాన్నైనా చక్కపెట్టగల సమర్థురాలు’’ అంటూ తన మేనకోడలి గురించి చెప్పారు శారద.

‘‘మా ఉషా తన భర్త వాన్స్ వైపు ఉంది కాబట్టి, ఆయనకు గెలుపు అవకాశాలు ఎక్కువ ఉన్నాయి’’ అన్నారామె.

‘‘మా మధ్య మరీ అంత దగ్గరి సంబంధాలు లేవు. ఎప్పుడైనా చాట్ చేసుకుంటాం. ఈ వార్త వచ్చాక మాత్రం ఉషాకు ఫోన్ చేసి శుభాకాంక్షలు చెప్పాను’’ అన్నారు శారద.

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)