ஜோக்கர்: சிறந்த நடிகருக்கான ஆஸ்கர் விருதை வென்றார் வாக்கின் ஃபீனிக்ஸ்

92வது 'அகாடமி அவார்ட்ஸ்' எனப்படும் ஆஸ்கர் விருதுகள் விழா அமெரிக்காவின் லாஸ் ஏஞ்சலீஸ் நகரிலுள்ள ஹாலிவுட்டில் நடைபெற்று வருகிறது.

கடந்த 2019ம் ஆண்டு உலகம் முழுவதும் வெளியான ஆயிரக்கணக்கான திரைப்படங்களில் குறிப்பிடத்தக்க வகையில் மக்களிடையே வரவேற்பையும், சமூகத்தில் தாக்கத்தையும் ஏற்படுத்திய திரைப்படங்கள், ஆவணப்படங்கள் ஆகியவற்றிற்கு பல்வேறு பிரிவுகளின் கீழ், வல்லுநர் குழுவின் தீவிர ஆலோசனைக்கு பிறகு, ஆஸ்கர் விருதுகள் அறிவிக்கப்பட்டு வருகின்றன.

அந்த வகையில், இந்த ஆண்டுக்கான முதல் ஆஸ்கர் விருதினை பிரபல ஹாலிவுட் நடிகர் பிராட் பிட் தட்டிச் சென்றார். "ஒன்ஸ் அப்பான் ஏ டைம் இன் ஹாலிவுட்" எனும் திரைப்படத்தில் சிறந்த நடிப்பை வெளிப்படுத்திய பிராட் பிட்டுக்கு 'சிறந்த துணை நடிகர்' எனும் பிரிவில் ஆஸ்கர் விருது அறிவிக்கப்பட்டுள்ளது.

30 ஆண்டுகளுக்கு மேலாக ஹாலிவுட் திரைத்துறையில் குறிப்பிடத்தக்க நடிகராக விளங்கி வரும் பிராட் பிட் தனது நடிப்பு திறமைக்காக பெறும் முதல் ஆஸ்கர் விருது இதுதான்.

அதே போன்று, சிறந்த துணை நடிகைக்கான விருதை 'மேரேஜ் ஸ்டோரி' எனும் படத்தில் நடித்த லாரா டெர்ன் பெற்றார்.

ஜோக்கர் திரைப்படத்தில் நடித்ததற்காக சிறந்த நடிகருக்கான ஆஸ்கர் விருதை வாக்கின் ஃபீனிக்ஸ் வென்றார்.

நீண்டகால இடைவேளைக்கு பிறகு திரைப்படத்துறைக்குள் நுழைந்த ரெனீ ஜெல்வெகர், 'ஜூடி' என்ற திரைப்படத்திற்காக சிறந்த நடிகைக்கான ஆஸ்கர் விருதை வென்றார்.

அதே போன்று, மிகவும் எதிர்பார்க்கப்பட்ட சிறந்த திரைப்படத்திற்கான ஆஸ்கர் விருதை தென்கொரிய திரைப்படமான 'பாராசைட்' பெறுவதாக அறிவிக்கப்பட்டது. இந்த திரைப்படத்தை இயக்கிய போங் ஜோன்-ஹோ சிறந்த இயங்குநருக்கான ஆஸ்கர் விருதை பெற்றார்.

இதன் மூலம் 91 ஆண்டுகால ஆஸ்கர் விருதுகள் வரலாற்றில் சிறந்த திரைப்படத்திற்கான விருதை பெறும் முதல் ஆங்கிலம் அல்லாத திரைப்படமாக பாராசைட் உருவெடுத்துள்ளது. இந்த திரைப்படம் மொத்தம் நான்கு ஆஸ்கர் விருதுகளை இந்த ஆண்டு குவித்துள்ளது.

சிறந்த ஆடை வடிவமைப்பாளருக்கான ஆஸ்கர் விருதை 'லிட்டில் வுமன்' திரைப்படத்தில் பணியாற்றியதற்காக ஜாக்குலின் டர்ரன் பெற்றார்.

எந்த திரைப்படம் அதிக விருதுகளை வென்றது?

ஒவ்வொரு ஆண்டும் தனிப்பட்ட பிரிவுகளை தவிர்த்து, ஒட்டுமொத்தமாக அதிக விருதுகளை எந்த திரைப்படம் அள்ளி செல்கிறது என்ற தகவல் ஆவலுடன் எதிர்பார்க்கப்படும்.

அந்த வகையில், இந்த ஆண்டு ஆஸ்கர் விழாவில் அதிகபட்சமாக நான்கு விருதுகளை 'பாராசைட்' திரைப்படமும், மூன்று விருதுகளை '1917' திரைப்படமும், 'ஒன்ஸ் அப்பான் ய டைம் இன் ஹாலிவுட்', 'ஜோக்கர்', 'போர்ட் vs பெர்ராரி' ஆகிய திரைப்படங்கள் தலா இரண்டு திரைப்படங்களையும் வென்றுள்ளன.

சிறந்த அனிமேஷன் திரைப்படத்திற்கான ஆஸ்கர் விருதை 'ஸ்டோரி 4' வெல்ல, அதை அத்திரைப்படத்தின் தயாரிப்பாளரான ஜோனாஸ் பெற்றுக்கொண்டார்.

சிறந்த குறும் ஆவணப்படத்திற்கான ஆஸ்கர் விருதை 'லேர்னிங் டு ஸ்கேட்போர்டு இன் ய வார் சோன் (இப் யூ ஆர் ய கேர்ள்)" எனும் திரைப்படம் தட்டிச்சென்றது. சென்ற ஆண்டு இதே பிரிவிற்கான விருதினை, மலிவு விலை நாப்கினை உருவாக்கிய கோயம்புத்தூரை சேர்ந்த அருணாச்சலம் முருகானந்தம் நடித்த 'பீரியட். எண்டு ஆஃப் சென்டன்ஸ்' வென்றிருந்தது குறிப்பிடத்தக்கது.

மற்ற பல்வேறு பிரிவுகளுக்கான ஆஸ்கர் விருதுகள் தொடர்ந்து அறிவிக்கப்பட்டு வருகின்றன.

ஆஸ்கர் தமிழர்

கடந்த 2009ஆம் ஆண்டு 81ஆவது அகாடமி அவார்ட்ஸ் விழாவில், தமிழகத்தை சேர்ந்த பிரபல இசையமைப்பாளர் ஏ.ஆர். ரஹ்மான், ஸ்லம்டாக் மில்லியனர் என்னும் திரைப்படத்திற்கு இசையமைத்ததற்காக இரண்டு ஆஸ்கர் விருதுகளை வென்று சாதனைப் படைத்திருந்தார்.

அதாவது, சிறந்த இசை மற்றும் சிறந்த அசல் பாடல் ஆகிய இரு பிரிவுகளில் ஏ.ஆர். ரஹ்மானுக்கு ஆஸ்கர் விருது வழங்கப்பட்டது. இரண்டு விருதுகளையும் பெற்ற அவர், 'எல்லா புகழும் இறைவனுக்கே' என்று மேடையில் கூறியது பலத்த வரவேற்பை பெற்றது.

பிற செய்திகள்:

சமூக ஊடகங்களில் பிபிசி தமிழ்: