ஜருகண்டி - சினிமா விமர்சனம்

வெங்கட் பிரபுவிடம் உதவி இயக்குனராகப் பணியாற்றிய பிச்சுமணி இயக்கியிருக்கும் முதல் படம். பணத் தேவைக்காக கதாநாயகன் ஒரு தவறான செயலில் இறங்க, அதனால் பெரும் சிக்கலுக்குள்ளாவதுதான் கதை.

கதாநாயகனான ஜெய் புதிதாக தொழில் துவங்க கடன் கிடைக்காமல், போலியான ஆவணங்களைக் கொடுத்து கடன் வாங்குகிறார்.

அதனை வைத்து டிராவல்ஸ் ஒன்றையும் துவங்குகிறார். இந்த நிலையில், இந்த விவகாரத்தைத் தெரிந்துகொள்ளும் காவல்துறை அதிகாரி ஒருவர் ஜெய்யிடமும் அவரது நண்பர் டேனியலிடமும் பத்து லட்சம் பணம் கேட்டு மிரட்டுகிறார்.

ரோபோ சங்கர், தன் காதலியான ரெபா மோனிகாவை தன்னோடு சேர்த்து வைத்தால் பத்து லட்ச ரூபாய் பணம் தருவதாக சொல்கிறார்.

அதனால் ரெபா மோனிகாவைக் கடத்துகிறார்கள் ஜெய்யும் டேனியலும். இந்தக் கடத்தலைத் தொடர்ந்து, பெரும் சிக்கலில் மாட்டிக்கொள்கிறார்கள் இருவரும். அந்த சிக்கலில் இருந்து எப்படி மீள்கிறார்கள் என்பது மீதிக் கதை.

துவங்கிய உடனேயே விறுவிறுப்பாக நகர ஆரம்பிக்கிறது படம். போலியாக ஆவணங்களை சமர்ப்பித்து கதாநாயகன் கடன் வாங்குவது, அதையடுத்து காவல்துறையின் மிரட்டலுக்கு ஆளாவது, பணத்திற்காக பெண்ணைக் கடத்துவது, இதனால் மாஃபியா கும்பலுக்குள் மாட்டிக்கொள்வது என முதல் பாதியின் திரைக்கதை பறக்கிறது.

ஆனால், இடைவேளைக்குப் பிறகு கோட்டைவிட்டிருக்கிறார்கள். கடத்தி வந்த பெண் தப்பியதால், நண்பனை அடகுவைத்துவிட்டு அந்தப் பெண்ணைத் தேட ஆரம்பிக்கிறார் கதாநாயகன்.

இரண்டு நாட்களுக்குள் காவல்துறை அதிகாரிக்கு பணத்தை வேறு தரவேண்டும். இவ்வளவு சிக்கலான சூழலில், மிக பதற்றமாக நகர வேண்டிய படம், பாட்டு, சண்டை, தேவையில்லாத காட்சிகள் என பொறுமையை சோதிக்க ஆரம்பிக்கிறது. படம் முடியும்போது ஒரு நீண்ட படத்தைப் பார்த்த உணர்வு ஏற்படுகிறது.

இந்தப் படத்தின் கதாநாயகன் ஜெய் என்றாலும், படத்தை தொடர்ந்து பார்க்க வைப்பவர் கஜேந்திரனாக வரும் ரோபோ சங்கர்தான்.

தனக்கு ஏற்கனவே கல்யாணம் ஆனதை மறைத்து காதலிப்பது, அதற்காக ஏகப்பட்ட பணத்தைச் செலவழிப்பது, கடத்தலில் ஈடுபடுவது என கலகலப்பாக படத்தை முன்னகர்த்திச் செல்கிறார்.

கதாநாயகனுக்கு நண்பனாக வரும் டேனியல், போலி ஆவணங்களை வைத்து கடன் வாங்கிக் கொடுக்கும் இளவரசு ஆகியோரது நடிப்பும் ஓகே.

இரண்டு, மூன்று பாடல்கள் இருந்தாலும் எதுவும் மனதில் ஓட்டவில்லை. ஆனால், ஆர்.டி. ராஜசேகரின் ஒளிப்பதிவு மனதைக் கவர்கிறது.

படத்தின் முதல் பாதி திரைக்கதையில் கவனம் செலுத்தியதைப் போல பிற்பாதியிலும் செலுத்தியிருந்தால், ஒரு முழுமையான, விறுவிறுப்பான படம் கிடைத்திருக்கும்.

சினிமா நடிகர்களுக்கு ஆயுதமாகும் தொழில்நுட்பம் - கிளிக் தொழில்நுட்ப நிகழ்ச்சி

பிற செய்திகள்:

சமூக ஊடகங்களில் பிபிசி தமிழ்: