Je, klabu ya Barcelona ni 'mfamaji anayetapatapa'?

Usajili mkubwa, masuala ya kifedha yanayoendelea na hasira nyingi kutoka kwingineko kwenye soka – kwa kweli msimu wa Barcelona haujatulia.

Franck Kessie, Andreas Christensen, Robert Lewandowski, Raphinha na Jules Kounde wote wamewasili Nou Camp kwa karibu £200m, licha ya klabu hiyo kuwa na deni la zaidi ya £1bn.

Ili kupunguza shinikizo la kifedha kwa muda mfupi na kuruhusu wachezaji wao wapya kusajiliwa, wameuza asilimia ya haki zao za baadaye za televisheni na kitengo chao cha utayarishaji wa vyombo vya habari Barca Studios, lakini mbinu ya rais wa klabu Joan Laporta imesababisha shutuma anaonekana kana kwamba a nacheza kamari na mustakabali wa muda mrefu wa klabu hiyo .

Barca wako kwenye shimo refu na wanajaribu kutoka. Je, kila kitu wanachofanya ni sawa? Hapana. Je, wanafanya kile wanachopaswa kufanya? ndiyo.

Yote au chochote' kwa Laporta

Laporta anarudia mbinu nzuri ilioiletea klabu hiyo mafanikio makubwa katika enzi yake ya kwanza ya uongozi. Yote au hakuna. Hapo nyuma pia alilaumu tawala zilizopita kwa hali mbaya aliyorithi.

Sasa, amepuuza uharibifu wa kifedha unaosababishwa na janga la ulimwengu, amerithi kutoka kwa mtangulizi wake Josep Maria Bartomeu .

Kwa hakika, ni Bartomeu ambaye alitenganisha baadhi ya biashara ambazo sasa zinauzwa kwa karibu £760m, kuruhusu klabu kununua wachezaji.

Ni wazi chini ya rais huyo wa zamani maamuzi mabaya yalifanywa kwa upande wa michezo ikiwa ni pamoja na kuongezwa kwa kandarasi ghali kwa wachezaji maarufu - na Bartomeu mwenyewe angekubaliana na hilo. Lakini sio kila kitu kilikuwa kibaya.

Kumekuwa na vita vya wenyewe kwa wenyewe kila mara huko Barcelona kati ya pande mbili zinazopigania mamlaka kila mara, zinazowakilishwa sasa na Bartomeu na Sandro Rosell kwa upande mmoja (kuanzishwa kwa Kikatalani) na Laporta kwa upande mwingine. Nguvu hiyo mara nyingi inamlazimisha rais wa klabu kwenda kwa muda mfupi ili kuwafurahisha mashabiki na vyombo vya habari na si kuangalia picha kubwa zaidi.

Kwa hivyo Barcelona, ​​kupitia kuchukua mkopo na kuuza vipande vya klabu, walikuwa na pesa za kununua wachezaji. Ingawa tatizo lilikuwa ni kuwasajili, kwa sababu walikuwa wakihangaika kulipa mishahara ya wachezaji wapya huku wakizingatia sheria kali za uchezaji wa haki za kifedha za ligi ya La Liga.

Sasa, hata hivyo, ikifanya kazi chini ya sheria ya 1/1 ya La Liga, kila senti ambayo klabu inaokoa inaweza kuwekezwa kwa wachezaji wapya - hapo awali, chini ya sheria ya 1/4, walihitaji kuokoa senti nne ili kuweza kuwekeza mchezaji mmoja.

Kwa hivyo sasa, kwa mfano, ikiwa Gerard Pique hatimaye atakubali kupunguziwa mshahara wake kwa kiasi kikubwa - jambo ambalo lilionekana kufanywa lakini limepungua katika siku za hivi karibuni - hiyo itasaidia usajili wa Kounde, ambaye labda atacheza nafasi yake.

Laporta ameamua kutumia fedha nyingi zilizopo kwa sasa kukusanya kikosi imara, akiamini kwamba mafanikio uwanjani yataleta pesa na washirika, jambo ambalo litasaidia kulipa mishahara na ada ya uhamisho katika siku zijazo, ambayo italeta mafanikio, ambayo yataleta wachezaji wa hali ya juu.

Barcelona wanapiga hesabu kwamba mafanikio uwanjani yanawakilisha 30-40% ya thamani ya chapa hiyo na pia wanaamini kuwa chapa yao ni kubwa sana kiasi kwamba itadumu hata mwaka mmoja au miwili bila mafanikio makubwa ilimradi tu wachezaji wakubwa wavae jezi zao.

Hofu kwa siku zijazo

Wale ambao hawaoni mpango mzima kwa njia sawa na ile ya Laporta wanahofia siku zijazo, hata hivyo.

Mnamo 2003, wakati Laporta alipowasili kwa mara ya kwanza, Barcelona ilikuwa na mapato ya euro 170m, katikati ya jedwali ikilinganishwa na vilabu vingine vya Uropa. Kulikuwa na uwezekano mkubwa wa kuboreshwa na maamuzi ya busara.

Sasa, ingawa, Barcelona wako juu ya katika suala la mapato, na chapa ni kali kama inavyoweza kuwa. Kuanza kushinda mataji makubwa tena hakutatafsiri ukuaji zaidi katika muda mfupi. Kimsingi, klabu tayari imeongeza njia za kitamaduni za kupata pesa - haki za TV, uuzaji, tikiti.

Njia pekee ya kweli ya kukuza ukuaji wa muda wa kati hadi mrefu ni kupitia shughuli za kidijitali za klabu, lakini Laporta ameuza takriban 50% ya biashara hiyo.

Muhimu kuanzia sasa na kuendelea - wanasema wakosoaji - ni kuzalisha fedha lakini inaonekana rasimu ya kwanza ya bajeti ya klabu kwa mwaka ujao inaashiria hasara ya uendeshaji. Kwa hivyo, njia pekee ya kusawazisha mapato na matumizi, na kutoa pesa taslimu, itabidi iwe kuuza vipande vidogo vya taasisi.

Kwa hivyo maono ya Laporta yana hatari nyingi - na inahitaji mafanikio uwanjani.

Je, wanaweza kufanikiwa vipi uwanjani?

Lewandowski – mchezaji wao mpya - sio Ronaldinho. Na mafanikio hayo katika enzi ya kwanza ya Laporta pia yalitokana na bidhaa za ndani, pamoja na Messi bila shaka.

Pedri anafanana na Andres Iniesta, lakini sioni Xavi, Sergio Busquets, Carles Puyol au kitu chochote karibu na Messi kwenye timu ya sasa. Timu imepata ubora na itashinda michezo mingi kulingana na ubora huo. Jambo ambalo haliko wazi ni jinsi watakavyocheza dhidi ya pande kubwa, wakati ubora zaidi wa timu utahitajika.

Sare ya bila kufungana siku ya Jumamosi dhidi ya Rayo Vallecano inaonyesha wazi kuwa ni kazi inayoendelea. Lakini meneja, na Laporta mwenye matumaini makubwa, anasisitiza kwamba watafika hapo.

Na hiyo si funguo mojawapo ya soka? Kwa timu na klabu kutoa matumaini. Kufikiria maisha bora ya baadaye ni sehemu ya kazi ya klabu na meneja.

Je, nini kitatokea ikiwa mafanikio hayafiki uwanjani?

Benki ya uwekezaji Goldman Sachs inatoa euro 2bn kwa klabu katika mikopo mbalimbali na nina uhakika itakuwa tayari kuchukua nafasi ikihitajika.

Ijapokuwa mkopo uliotolewa kujenga upya uwanja huo (euro 1.5bn) ni pesa nzuri kwa Barcelona kwa sababu hawana haja ya kuirejesha hadi waanze kupata pesa kutoka kwa mitambo mipya, ikiwa kila kitu kitaenda vibaya klabu itaishia kwenye mikono ya wawekezaji wa kibinafsi.

Kwa vyovyote vile, Barcelona si mali ya wamiliki wa tikiti za msimu tena; wanashiriki umiliki huo na wale ambao wamenunua sehemu za klabu.

'La Liga iko hai na inaendelea vizuri'

Kwa nini kuna shutuma nyingi kuhusu Barcelona - na La Liga - kutoka Uingereza?

Sawa, ninaelewa kikamilifu kwamba unaporudia kichefuchefu cha matangazo kwamba wewe ni klabu maalum, tofauti na nyingine yoyote, kisha usiwe na tabia kama hiyo, upinzani hauepukiki.

Lakini hebu tuambie hadithi nyingine. Hii ni klabu kubwa inayotazamia kuishi katika ulimwengu wa baada ya janga ambalo limebadilika sana katika muongo mmoja uliopita, vilabu pinzani vinavyoungwa mkono na majimbo na Ligi ya Premia bora vikiwa na hali nzuri ya kifedha.

Matarajio ya kuvutia, sivyo? Kwa hivyo kwa nini wengi wanataka kuiona Barcelona inaendelea kutatizika? Katika baadhi ya matukio nadhani kuna kipengele cha wivu na chuki klabu nyingi kubwa huvutia, wakati wengine wanasikitisha kwamba toleo la zamani la kimapenzi la Barcelona limekwisha na inakuwa kama klabu nyingine yoyotu.

Hakika tabia ya klabu kwa kiungo Mholanzi Frenkie de Jong ni ya kashfa. Sio mara ya kwanza, klabu inajaribu kumuondoa mchezaji ili kurekebisha makosa yake yenyewe.

Lakini yote hayo , ninachokiona ni kuendelea kuvutiwa na La Liga na vilabu vyake. Ikilinganishwa na Ligi ya Premia, kauli ya kawaida ya siku za hivi karibuni ni kwamba La Liga imekufa au inakufa. Kisha Real Madrid wakashinda Ligi ya Mabingwa. Nadhani hakuna mtu anapenda kukosea - labda hiyo inaelezea maoni kadhaa.

La Liga iko hai na inaendelea vizuri na mwaka huu, kama ningekuwa wewe, ningeifuatilia. Ushindani mkali unatarajiwa .