Ulimwengu unakabiliwa na muongo hatari zaidi tangu vita vya Pili vya Dunia - Putin

Ulimwengu "huenda unakabiliwa na muongo hatari zaidi" tangu kumalizika kwa Vita vya pili vya dunia , Rais wa Urusi Vladimir Putin ameonya.

Katika hotuba yake ya Alhamisi, alitaka kuhalalisha uvamizi wa Urusi dhidi ya Ukraine, hatua ambayo imeiacha nchi yake kutengwa kimataifa.

Bw Putin pia alizishutumu nchi za Magharibi kwa usaliti dhidi ya Urusi na kulazimisha washirika wake kuikacha Moscow.

Nchi za Magharibi zimeshutumu vitisho vya nyuklia vya hivi karibuni vinavyofanywa chini kwa chini na Kremlin.

Mapema wiki hii, muungano wa kijeshi wa Nato ulilaani madai ambayo hayajathibitishwa na Urusi kwamba Ukraine inaweza kutumia "bomu chafu" - vilipuzi vya kawaida vilivyowekwa nyenzo za mionzi hatari.

Katibu Mkuu wa Nato Jens Stoltenberg alisema wanachama wa muungano "wanapinga madai haya" na "Urusi haipaswi kuyatumia kama kisingizio".

Rais Putin alikuwa akizungumza katika kongamano la kila mwaka la Valdai baada ya upinzani mkali wa kijeshi hivi majuzi nchini Ukraine na kuongezeka kwa hasira ya umma nchini Urusi kutokana na harakati za kuwakusanya Warusi wapatao 300,000 kwa ajili ya kuongeza askari kusaidia vita.

Siku moja kabla ya hotuba yake huko Moscow, alikuwa ameongoza mazoezi ya kawaida ya nyuklia ambayo yalihusisha shambulio la nyuklia la kukabiliana na shambulio kubwa la nyuklia la adui.

"Hatujawahi kusema lolote kuhusu uwezekano wa Urusi kutumia silaha za nyuklia. Tumejibu tu kwa vidokezo kwa maoni yaliyotolewa na viongozi wa nchi za Magharibi," aliiambia hadhira yake.

Rais Putin alimtaja waziri mkuu wa zamani wa Uingereza Liz Truss kwa kusema wakati wa kampeni za uchaguzi za mwezi Agosti kwamba atakuwa tayari kubonyeza kitufe cha nyuklia ikiwa mazingira yatamtaka kufanya hivyo.

Putin alisema alishangaa washirika wa Uingereza hawakupinga: "Tulipaswa kufanya nini? kunyamaza? Tujifanye kuwa hatukusikia?" Hata hivyo, yeye mwenyewe ameonya mara kwa mara kwamba Urusi itatumia "njia zote zilizopo" kujilinda, katika kile ambacho kimeonekana kuwa tishio la wazi la nyuklia.

Alirudia mashambulizi yake ya hivi majuzi dhidi ya nchi za Magharibi, na kile alichokiita "mchezo hatari, wa umwagaji damu na mchafu" wa kunyima nchi uhuru na upekee wao.

"Utawala" wa Magharibi juu ya maswala ya ulimwengu sasa unakaribia mwisho, alisisitiza. "Tuko kwenye mpaka wa kihistoria.

Huenda mbele ni hatari zaidi, isiyotabirika na wakati huo huo muongo muhimu tangu kumalizika kwa Vita vya Pili vya Dunia." Nchi za Magharibi hazikuwa na uwezo zaidi wa kutawala - lakini zilikuwa "zikijaribu sana" kufanya hivyo.

Alisema "utaratibu wa ulimwengu ujao unatengenezwa mbele ya macho yetu", na akashutumu nchi za Magharibi, zikiongozwa na Marekani, kwa kujaribu kuiangamiza Urusi. Hakuna ushahidi uliotolewa kuunga mkono madai yake.

Katika ulimwengu wa Putin hakuna kujuta

Mhariri wa BBC Urusi, Steve Rosenberg anasema "Tulichoona na kusikia leo ni kuhusu ulimwengu kwa mujibu wa Vladimir Putin.

Ni ulimwengu ambao Urusi ni nchi safi huku nchi za Magharibi zikipaswa kulaumiwa kwa kila kitu, kuanzia vita vya Ukraine hadi mzozo wa chakula duniani.

Tulimwona kiongozi wa Kremlin ambaye hajutii kabisa kile alichokifanya.

Alizilaumu nchi za Magharibi kwa "kuchochea" vita nchini Ukraine; alisisitiza kwamba utaratibu mpya wa ulimwengu unapaswa kutegemea "sheria na haki" - hii kutoka kwa rais ambaye, miezi minane iliyopita, alianzisha uvamizi kamili wa taifa huru.

Alidai kuwa Urusi imeshutumiwa kimakosa kwa kutishia kutumia silaha za nyuklia. Na hata hivyo, tangu Februari, Rais Putin ameonyesha viashiria kadhaa visivyo wazi kwamba atakuwa tayari kutumia kila aina ya silaha katika safu za silaha za Urusi katika mzozo huu.

Kwangu, labda maoni yanayojieleza zaidi yalikuwa ni kuhusu "hasara" ambayo Rais Putin alikiri kumtesa katika 'operesheni yake maalum ya kijeshi.'

"Siku zote huwa nikifikiria maisha ya wanadamu yaliyopotea," alisema kabla ya kuhamia haraka kwenye "faida kubwa" ambazo Urusi, kwa maoni yake, ilipata, ikiwa ni pamoja na "kuimarishwa kwa uhuru wa Urusi".

Hakuna kidokezo cha majuto au majuto na hakuna dalili ya kurudi nyuma.