ਕੈਨੇਡਾ-ਅਮਰੀਕਾ ਸਰਹੱਦ 'ਤੇ ਮਾਰੇ ਗਏ ਭਾਰਤੀ ਪਰਿਵਾਰ ਬਾਰੇ ਸਾਨੂੰ ਕੀ ਕੁਝ ਪਤਾ ਹੈ
ਤਸਵੀਰ ਸਰੋਤ, kartik jaani
ਕੈਨੇਡਾ ਦੇ ਓਟਾਵਾ ਵਿੱਚ ਭਾਰਤੀ ਰਾਜਦੂਤ ਨੇ ਇੱਕ ਬਿਆਨ ਜਾਰੀ ਕਰਕੇ ਕਿਹਾ ਹੈ ਕਿ 19 ਜਨਵਰੀ, 2022 ਨੂੰ ਸਰਹੱਦ 'ਤੇ ਮਿਲੀਆਂ ਚਾਰ ਲਾਸ਼ਾਂ ਇੱਕ ਗੁਜਰਾਤੀ ਪਰਿਵਾਰ ਦੀਆਂ ਹਨ।
ਦੂਤਾਵਾਸ ਨੇ ਕਿਹਾ ਕਿ ਸਥਾਨਕ ਕੈਨੇਡੀਅਨ ਅਧਿਕਾਰੀਆਂ ਨੇ ਚਾਰ ਮ੍ਰਿਤਕਾਂ ਦੀ ਪਛਾਣ ਕੀਤੀ ਹੈ। ਇਨ੍ਹਾਂ ਵਿੱਚ ਜਗਦੀਸ਼ ਪਟੇਲ, ਵੈਸ਼ਾਲੀ ਪਟੇਲ, ਵਿਹਾਂਗੀ ਪਟੇਲ ਅਤੇ ਧਾਰਮਿਕ ਪਟੇਲ ਸ਼ਾਮਲ ਹਨ।
ਧਿਆਨ ਦੇਣ ਯੋਗ ਹੈ ਕਿ ਮੀਡੀਆ ਵਿੱਚ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਪਰਿਵਾਰ ਗੁਜਰਾਤ ਦੇ ਡਿੰਗੂਚਾ ਪਿੰਡ ਦਾ ਹੈ ਅਤੇ ਗੁਜਰਾਤ ਦੇ ਹੀ ਕਲੋਲ ਵਿੱਚ ਰਹਿੰਦਾ ਹੈ।
ਤਸਵੀਰ ਸਰੋਤ, Getty Images
ਹਾਲਾਂਕਿ ਉਨ੍ਹਾਂ ਉੱਪਰ ਗੈਰ-ਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ਵਿੱਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕਰਨ ਦਾ ਵੀ ਇਲਜ਼ਾਮ ਲਗਾਇਆ ਗਿਆ ਸੀ।
ਮ੍ਰਿਤਕਾਂ ਦੇ ਪਰਿਵਾਰ ਵਾਲਿਆਂ ਨੂੰ ਇਤਲਾਹ ਦੇ ਦਿੱਤੀ ਗਈ ਹੈ ਅਤੇ ਕੈਨੇਡਾ ਵਿੱਚ ਭਾਰਤੀ ਦੂਤਾਵਾਸ ਲਗਾਤਾਰ ਉਨ੍ਹਾਂ ਦੇ ਸੰਪਰਕ ਵਿੱਚ ਹੈ ਅਤੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਬਿਆਨ ਵਿੱਚ ਅੱਗੇ ਕਿਹਾ ਗਿਆ ਹੈ ਕਿ ਡਾਕਟਰੀ ਜਾਂਚ ਤੋਂ ਬਾਅਦ ਮੌਤ ਦਾ ਕਾਰਨ ਬਾਹਰੀ ਤੱਤਾਂ ਦੇ 'ਲੰਬੇ ਸਮੇਂ ਤੱਕ ਸੰਪਰਕ ਵਿੱਚ ਰਹਿਣਾ' ਦੱਸਿਆ ਗਿਆ ਹੈ।
ਇਹ ਵੀ ਪੜ੍ਹੋ:
ਇਸ ਲੇਖ ਵਿੱਚ X ਤੋਂ ਮਿਲੀ ਸਮੱਗਰੀ ਸ਼ਾਮਲ ਹੈ। ਕੁਝ ਵੀ ਡਾਊਨਲੋਡ ਹੋਣ ਤੋਂ ਪਹਿਲਾਂ ਅਸੀਂ ਤੁਹਾਡੀ ਇਜਾਜ਼ਤ ਮੰਗਦੇ ਹਾਂ ਕਿਉਂਕਿ ਇਸ ਵਿੱਚ ਕੁਕੀਜ਼ ਅਤੇ ਦੂਜੀਆਂ ਤਕਨੀਕਾਂ ਦਾ ਇਸਤੇਮਾਲ ਕੀਤਾ ਹੋ ਸਕਦਾ ਹੈ। ਤੁਸੀਂ ਸਵੀਕਾਰ ਕਰਨ ਤੋਂ ਪਹਿਲਾਂ X ਕੁਕੀ ਪਾਲਿਸੀ ਤੇ ਨੂੰ ਪੜ੍ਹਨਾ ਚਾਹੋਗੇ। ਇਸ ਸਮੱਗਰੀ ਨੂੰ ਦੇਖਣ ਲਈ ਇਜਾਜ਼ਤ ਦੇਵੋ ਤੇ ਜਾਰੀ ਰੱਖੋ ਨੂੰ ਚੁਣੋ।
End of X post
ਕੈਨੇਡੀਅਨ ਏਜੰਸੀਆਂ ਦੇ ਸਹਿਯੋਗ ਨਾਲ ਭਾਰਤੀ ਹਾਈ ਕਮਿਸ਼ਨ ਇਸ ਘਟਨਾ ਦੀ ਜਾਂਚ ਕਰ ਰਿਹਾ ਹੈ।
ਕੈਨੇਡਾ ਦੀ ਪੁਲਿਸ ਮੁਤਾਬਕ ਇੱਕ ਛੋਟੇ ਬੱਚੇ ਸਮੇਤ ਚਾਰ ਲੋਕਾਂ ਦੀਆਂ ਲਾਸ਼ਾਂ ਅਮਰੀਕੀ ਸਰਹੱਦ ਦੇ ਕੋਲ ਇੱਕ ਵੱਡੇ ਮੈਦਾਨ ਵਿੱਚ ਮਿਲੀਆਂ ਸਨ।
ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਸਾਰੀਆਂ ਮੌਤਾਂ ਬੁੱਧਵਾਰ ਨੂੰ -35 ਡਿਗਰੀ ਸੈਲਸੀਅਸ ਦੀ ਠੰਢੀ ਹਵਾ ਦੇ ਸੰਪਰਕ ਵਿੱਚ ਰਹਿਣ ਕਾਰਨ ਹੋਈਆਂ।
ਜਦੋਂ ਪਟੇਲ ਪਰਿਵਾਰ ਦੇ ਲਾਪਤਾ ਹੋਣ ਅਤੇ ਮੌਤ ਦੀ ਖ਼ਬਰ ਆਈ ਤਾਂ ਬੀਬੀਸੀ ਗੁਜਰਾਤੀ ਸੇਵਾ ਨੇ ਪਰਿਵਾਰ ਦੇ ਮੁਖੀ ਅਤੇ ਲਾਪਤਾ ਜਗਦੀਸ਼ ਪਟੇਲ ਦੇ ਪਿਤਾ ਬਲਦੇਵ ਭਾਈ ਨਾਲ ਗੱਲਬਾਤ ਕੀਤੀ।
ਬਲਦੇਵ ਭਾਈ ਨੇ ਕਿਹਾ, ''ਦਸ ਦਿਨ ਪਹਿਲਾਂ, ਮੇਰਾ ਬੇਟਾ ਕੈਨੇਡਾ ਲਈ ਰਵਾਨਾ ਹੋਇਆ। ਉਸ ਨੇ ਮੈਨੂੰ ਫ਼ੋਨ ਕਰਕੇ ਦੱਸਿਆ ਕਿ ਉਸ ਨੂੰ ਕੈਨੇਡਾ ਦਾ ਵੀਜ਼ਾ ਮਿਲ ਗਿਆ ਹੈ। ਉਹ, ਉਸ ਦੀ ਪਤਨੀ, ਬੇਟੀ ਵਿਹਾਂਗੀ ਤੇ ਬੇਟਾ ਧਾਰਮਿਕ ਸਾਰੇ ਕੈਨੇਡਾ ਗਏ ਸਨ।''
ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਪਿਛਲੇ ਪੰਜ-ਛੇ ਦਿਨਾਂ ਤੋਂ ਉਨ੍ਹਾਂ ਦਾ ਜਗਦੀਸ਼ ਪਟੇਲ ਨਾਲ ਕੋਈ ਸੰਪਰਕ ਨਹੀਂ ਸੀ।
ਬਲਦੇਵ ਭਾਈ ਕਿਸਾਨ ਹਨ ਅਤੇ ਉਨ੍ਹਾਂ ਕੋਲ 20 ਵਿੱਘੇ ਜ਼ਮੀਨ ਦੇ ਹਨ। ਖੇਤੀ ਵਿੱਚ ਬਲਦੇਵ ਭਾਈ ਦੀ ਮਦਦ ਕਰਨ ਵਾਲੇ ਜਗਦੀਸ਼ ਆਪਣੇ ਬੱਚਿਆਂ ਦੀ ਵਧੀਆ ਪੜ੍ਹਾਈ ਲਈ ਕਲੋਲ ਵਿੱਚ ਵਸ ਗਏ ਸਨ ਤੇ ਉੱਥੇ ਹੀ ਬਿਜਲੀ ਦੀ ਦੁਕਾਨ ਕਰਦੇ ਸਨ।
ਬਲਦੇਵ ਭਾਈ ਨੇ ਕਿਹਾ ਕਿ ਉਨ੍ਹਾਂ ਨੂੰ ਨਹੀਂ ਪਤਾ ਸੀ ਕਿ ਜਗਦੀਸ਼ ਅਤੇ ਉਨ੍ਹਾਂ ਦੇ ਪਰਿਵਾਰ ਨੇ ਕੈਨੇਡਾ ਦੇ ਵੀਜ਼ਾ ਦੀ ਅਰਜ਼ੀ ਕਦੋਂ ਦਿੱਤੀ ਸੀ।
ਮੈਨੀਟੋਬਾ ਪੁਲਿਸ ਨੇ ਕੀ ਜਾਣਕਾਰੀ ਦਿੱਤੀ
ਰੌਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਨੇ 27 ਜਨਵਰੀ ਨੂੰ ਕੁਝ ਟਵੀਟ ਕਰਕੇ ਇਸ ਮਾਮਲੇ ਬਾਰੇ ਜਾਣਕਾਰੀ ਦਿੱਤੀ।
ਟਵੀਟਸ ਵਿੱਚ ਕਿਹਾ ਗਿਆ ਕਿ 19 ਜਨਵਰੀ ਨੂੰ ਰੌਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਨੂੰ ਐਮਰਸਨ ਦੇ ਕੋਲ, ਅਮਰੀਕਾ ਕੈਨੇਡਾ ਸਰਹੱਦ ਤੋਂ ਲਗਭਗ 12 ਮੀਟਰ ਦੂਰ ਚਾਰ ਲਾਸ਼ਾਂ ਮਿਲੀਆਂ।
ਤਸਵੀਰ ਸਰੋਤ, Twitter
26 ਜਨਵਰੀ ਨੂੰ ਪੋਸਟਮਾਰਟਮ ਮੁਕੰਮਲ ਕਰ ਲਏ ਗਏ ਅਤੇ ਪੀੜਤ ਇਹ ਹਨ-
- ਜਗਦੀਸ਼ ਕੁਮਾਰ ਪਟੇਲ, 39 ਸਾਲਾ ਪੁਰਸ਼
- ਵੈਸ਼ਾਲੀਬੇਨ ਪਟੇਲ, 37 ਸਾਲਾ ਮਹਿਲਾ
- ਵਿਹਾਂਗੀ ਪਟੇਲ, 11 ਸਾਲ ਬੱਚੀ
- ਧਾਰਮਿਕ ਪਟੇਲ, 3 ਸਾਲਾ ਬੱਚਾ
ਇੱਕ ਹੋਰ ਟਵੀਟ ਵਿੱਚ ਰੌਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਨੇ ਦੱਸਿਆ ਕਿ ਸਾਰੇ ਇੱਕੋ ਪਰਿਵਾਰ ਦੇ ਹਨ ਅਤੇ ਭਾਰਤੀ ਨਾਗਰਿਕ ਹਨ। ਐਮਬੀ ਦੇ ਚੀਫ਼ ਮੈਡੀਕਲ ਐਗਜ਼ਾਮੀਨਰ ਨੇ ਪੁਸ਼ਟੀ ਕੀਤੀ ਹੈ ਕਿ ਮੌਤ ਦੀ ਵਜ੍ਹਾ ਮੌਸਮ ਹੈ।
ਤਸਵੀਰ ਸਰੋਤ, Twitter
ਰੌਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਮੰਨਦੀ ਹੈ ਕਿ ਪਟੇਲ ਪਰਿਵਾਰ 12 ਜਨਵਰੀ ਨੂੰ ਟੋਰਾਂਟੋ ਪਹੁੰਚਿਆ ਸੀ ਅਤੇ ਉੱਥੋਂ ਲਗਭਗ 18 ਜਨਵਰੀ ਨੂੰ ਐਮਰਸਨ ਲਈ ਨਿਕਲ ਪਏ। ਉਸ ਥਾਂ ਤੋਂ ਅਤੇ ਆਸੇ-ਪਾਸਿਓਂ ਕੋਈ ਵਾਹਨ ਬਰਾਮਦ ਨਹੀਂ ਹੋਇਆ ਹੈ। ਇਸ ਦਾ ਮਤਲਬ ਹੈ ਕਿ ਕੋਈ ਉਨ੍ਹਾਂ ਨੂੰ ਸਰਹੱਦ 'ਤੇ ਛੱਡ ਕੇ ਚਲਿਆ ਗਿਆ।
ਗੈਰ-ਕਾਨੂੰਨੀ ਦਾਖ਼ਲੇ ਦਾ ਸ਼ੱਕ
ਬੀਬੀਸੀ ਗੁਜਰਾਤੀ ਨੇ ਅਹਿਮਦਾਬਾਦ ਕ੍ਰਾਈਮ ਬ੍ਰਾਂਚ ਅਤੇ ਸੇਵਾਮੁਕਤ ਏਐਸਪੀ ਦੀਪਕ ਵਿਆਸ ਨਾਲ ਗੱਲਬਾਤ ਕੀਤੀ।
ਵਿਆਸ ਨੇ ਵਿਜੀਲੈਂਸ ਸੈੱਲ ਨਾਲ ਵੀ ਕਈ ਸਾਲ ਕੰਮ ਕੀਤਾ ਹੈ। ਉਨ੍ਹਾਂ ਨੇ ਦੱਸਿਆ, ''ਜੇ ਕੈਨੇਡਾ ਦੇ ਹਾਈ ਕਮਿਸ਼ਨ ਤੋਂ ਇੰਨੀ ਦੇਰ ਤੱਕ ਕਿਸੇ ਦੀ ਮੌਤ ਦੀ ਇਤਲਾਹ ਨਹੀਂ ਮਿਲੀ ਹੈ ਤਾਂ ਇਹ ਸਾਫ਼ ਹੈ ਕਿ ਇਹ ਲੋਕ ਕਿਸੇ ਦੀ ਮਦਦ ਨਾਲ ਵਿਜ਼ਟਰ ਵੀਜ਼ਾ 'ਤੇ ਕੈਨੇਡਾ ਗਏ ਹੋਣਗੇ ਅਤੇ ਗੈਰਕਾਨੂੰਨੀ ਘੁਸਪੈਠ ਦੀ ਕੋਸ਼ਿਸ਼ ਦੌਰਾਨ ਠੰਢ ਨਾਲ ਮਰ ਗਏ।''
ਉਨ੍ਹਾਂ ਨੇ ਅੱਗੇ ਕਿਹਾ, ''ਬਾਕੀ ਵਿਦੇਸ਼ੀ ਸਰਕਾਰ ਨੂੰ ਉਨ੍ਹਾਂ ਦੀ ਪਛਾਣ ਕਰਨੀ ਚਾਹੀਦੀ ਹੈ ਤੇ ਭਾਰਤ ਨੂੰ ਜਵਾਬ ਦੇਣਾ ਚਾਹੀਦਾ ਹੈ।''
ਉਹ ਕਹਿੰਦੇ ਹਨ, ''ਜੇ ਅਜਿਹੇ ਮਾਮਲੇ ਵਿੱਚ ਕੋਈ ਧੋਖਾਧੜੀ ਹੁੰਦੀ ਹੈ ਤਾਂ ਸ਼ਾਇਦ ਹੀ ਕਦੇ ਪੁਲਿਸ ਸ਼ਿਕਾਇਤ ਹੁੰਦੀ ਹੈ। ਰੈਕੇਟ ਇਸੇ ਤਰ੍ਹਾਂ ਕੰਮ ਕਰਦਾ ਹੈ।''
ਗੁਜਰਾਤ ਪੁਲਿਸ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਵੀ ਨਾਮ ਨਾ ਛਾਪਣ ਦੀ ਸ਼ਰਤ 'ਤੇ ਸ਼ੱਕ ਜ਼ਾਹਰ ਕੀਤਾ ਕਿ ਗੁਜਰਾਤੀ ਪਰਿਵਾਰ ਗੈਰ-ਕਾਨੂੰਨੀ ਰੂਪ ਵਿੱਚ ਅਮਰੀਕਾ ਵਿੱਚ ਦਾਖਲ ਹੋਇਆ।
ਪਿਛਲੇ ਹਫ਼ਤੇ, ਬੁੱਧਵਾਰ ਨੂੰ ਸਥਾਨਕ ਸਮੇਂ ਮੁਤਾਬਕ ਸਵੇਰੇ ਕਰੀਬ ਸਾਢੇ ਨੌਂ ਵਜੇ, ਕੈਨੇਡੀਅਨ ਕਸਟਮਜ਼ ਤੇ ਬਾਰਡਰ ਪੈਟਰੋਲ ਪਾਰਟੀ ਨੇ ਕੈਨੇਡੀਅਨ ਪੁਲਿਸ ਨੂੰ ਇਤਲਾਹ ਦਿੱਤੀ ਕਿ ਉਨ੍ਹਾਂ ਨੇ ਇਲਾਕੇ ਵਿੱਚੋਂ ਲੰਘਣ ਵਾਲੇ ਕੁਝ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।
ਇਹ ਇਲਾਕਾ ਗੈਰ-ਕਾਨੂੰਨੀ ਤੌਰ 'ਤੇ ਸਰਹੱਦ ਪਾਰ ਕਰਨ ਦੀਆਂ ਕੋਸ਼ਿਸ਼ਾਂ ਕਾਰਨ ਬਦਨਾਮ ਹੈ।
ਅਮਰੀਕੀ ਅਧਿਕਾਰੀਆਂ ਨੇ ਕੈਨੇਡੀਅਨ ਟੀਮ ਨੂੰ ਸੂਚਿਤ ਕੀਤਾ ਕਿ ਇੱਕ ਵਿਅਕਤੀ ਬੱਚਿਆਂ ਦੇ ਸਮਾਨ ਨਾਲ ਮਿਲਿਆ ਹੈ। ਹਾਲਾਂਕਿ ਉਸ ਵਿਅਕਤੀ ਦੇ ਨਾਲ ਕੋਈ ਬੱਚਾ ਨਹੀਂ ਸੀ।
ਮੈਨੀਟੋਬਾ ਰੌਇਲ ਕੈਨੇਡੀਅਨ ਮਾਊਂਟੇਡ ਪੁਲਿਸ ਦੇ ਸਹਾਇਕ ਕਮਿਸ਼ਨਰ ਜੇਨ ਮੈਕਲਾਚੀ ਨੇ ਕਿਹਾ ਕਿ ਇਹ ''ਲੋਕ ਇੱਕ ਅੰਤਹੀਣ ਖੇਤਰ ਵਿੱਚ ਠੰਢ, ਘਾਤਕ ਹਨੇਰੇ ਅਤੇ ਹਵਾ ਦਾ ਸਾਹਮਣਾ ਬਿਨਾਂ ਕਿਸੇ ਮਦਦ ਦੇ ਕਰ ਰਹੇ ਸੀ।''
ਉਸੇ ਹਫ਼ਤੇ ਜਾਰੀ ਇੱਕ ਬਿਆਨ ਵਿੱਚ, ਮਿਨੀਸੋਟਾ ਵਿੱਚ ਅਮਰੀਕੀ ਫ਼ੈਡਰਲ ਅਧਿਕਾਰੀਆਂ ਨੇ ਫਲੋਰਿਡਾ ਨਿਵਾਸੀ 47 ਸਾਲਾ ਸਟੀਵ ਸ਼ੈਂਡ ਉੱਪਰ ਮਨੁੱਖੀ ਤਸਕਰੀ ਦੇ ਇਲਜ਼ਾਮ ਲਗਾਏ ਸਨ।
ਅਧਿਕਾਰੀਆਂ ਨੇ ਦੱਸਿਆ, ''ਸ਼ਾਂਡ ਸਰਹੱਦ ਦੇ ਇੱਕ ਪੇਂਡੂ ਇਲਾਕੇ ਵਿੱਚ 15 ਯਾਤਰੀ ਵੈਨਾਂ ਫੜੀਆਂ ਗਈਆਂ ਸਨ। ਉਨ੍ਹਾਂ ਦੇ ਕੋਲ ਖਾਣਾ ਅਤੇ ਪਾਣੀ ਵੀ ਸੀ। ਦੋ ਵਿਅਕਤੀ ਜੋ ਉਨ੍ਹਾਂ ਨੂੰ ਮਿਲੇ ਉਹ ਬਿਨਾਂ ਦਸਤਾਵੇਜ਼ਾਂ ਦੇ ਦੋ ਭਾਰਤੀ ਸਨ''
ਜਦੋਂ ਇਨ੍ਹਾਂ ਸਾਰੇ ਲੋਕਾਂ ਨੂੰ ਬਾਰਡਰ ਪੈਟਰੋਲ ਸਟੇਸ਼ਨ ਲਿਆਂਦਾ ਜਾ ਰਿਹਾ ਸੀ ਤਾਂ ਅਮਰੀਕੀ ਏਜੰਟਾਂ ਨੂੰ ਅਚਾਨਕ ਭਾਰਤੀ ਨਾਗਰਿਕਾਂ ਦਾ ਇੱਕ ਸਮੂਹ ਮਿਲਿਆ। ਉਨ੍ਹਾਂ ਨੇ ਏਜੰਟਾਂ ਨੂੰ ਦੱਸਿਆ ਕਿ ਉਹ 11 ਘੰਟਿਆਂ ਤੋਂ ਭੱਜ ਰਹੇ ਹਨ ਅਤੇ ਕਿਸੇ ਦੀ ਉਡੀਕ ਕਰ ਰਹੇ ਸਨ ਜਿਸ ਨੇ ਉਨ੍ਹਾਂ ਨੂੰ ਲੈਣ ਆਉਣਾ ਸੀ।
'ਇੱਕ ਪੁਰਸ਼ ਦੇ ਬੈਗ ਵਿੱਚ ਬੱਚਿਆਂ ਦੇ ਕੱਪੜੇ, ਖਿਡੌਣੇ ਅਤੇ ਦਵਾਈ ਵੀ ਸੀ। ਉਸ ਨੇ ਦੱਸਿਆ ਕਿ ਉਹ ਚਾਰ ਜਣਿਆਂ ਦੇ ਪਰਿਵਾਰ ਲਈ ਸਮਾਨ ਲਿਜਾਅ ਰਿਹਾ ਸੀ ਪਰ ਰਾਤ ਨੂੰ ਵਿੱਛੜ ਗਿਆ।'
ਗੁਜਰਾਤ ਦੇ ਪਟੇਲ ਭਾਈਚਾਰੇ ਵਿੱਚ ਵਿਦੇਸ਼ ਜਾਣ ਦੀ ਲਲਕ ਕਿਉਂ
ਗੁਤਜਰਾਤ ਤੋਂ ਵਿਦੇਸ਼ ਜਾਣ ਅਤੇ ਉਥੇ ਆਪਣਾ ਨਾਮ ਕਮਾਉਣ ਵਾਲਿਆਂ ਵਿੱਚ ਪਾਟੀਦਾਰ ਭਾਈਚਾਰੇ ਨੂੰ ਸਭ ਤੋਂ ਅੱਗੇ ਮੰਨਿਆ ਜਾਂਦਾ ਹੈ।
ਖ਼ਾਸ ਕਰਕੇ ਉੱਤਰੀ ਗੁਜਰਾਤ ਦੇ ਪੱਟੀਦਾਰ ਭਾਈਚਾਰੇ ਵਿੱਚ ਅਜਿਹਾ ਮੰਨਿਆ ਜਾਂਦਾ ਹੈ ਕਿ ਵਿਦੇਸ਼ ਜਾਣ ਦੀ ਪ੍ਰਬਲ ਇੱਛਾ ਹੁੰਦੀ ਹੈ।
ਉੱਤਰੀ ਗੁਰਜਰਾਤ ਦੇ ਪਟੇਲ ਸਮਾਜ ਦੇ ਆਗੂ ਅਤੇ ਸੇਵਾ ਮੁਕਤ ਅਧਿਆਪਕ ਆਰਐੱਸ ਪਟੇਲ ਨਾਲ ਬੀਬੀਸੀ ਗੁਜਰਾਤੀ ਨੇ ਇਸ ਬਾਰੇ ਗੱਲਬਾਤ ਕੀਤੀ।
ਆਰਐੱਸ ਪਟੇਲ ਨੇ ਕਿਹਾ, ''ਉੱਤਰੀ ਗੁਜਰਾਤ ਦੇ ਨੌਜਵਾਨ ਅਮਰੀਕਾ ਤੇ ਕੈਨੇਡਾ ਜਾਣ ਲਈ ਕੋਈ ਵੀ ਰਸਤਾ ਅਪਣਾ ਲੈਂਦੇ ਹਨ। ਉੱਤਰੀ ਗੁਜਰਾਤ ਦੇ 42 ਪਿੰਡਾਂ ਦੇ ਜ਼ਿਆਦਾਤਰ ਨੌਜਵਾਨ ਵਿਦੇਸ਼ ਵਿੱਚ ਸਥਾਪਤ ਹੋ ਗਏ ਹਨ। ਅਜਿਹੇ ਨੌਜਵਾਨਾਂ ਦਾ ਜਲਦੀ ਵਿਆਹ ਹੋ ਜਾਂਦਾ ਹੈ।''
ਇਨ੍ਹਾਂ ਪਿੰਡਾਂ ਨੂੰ ''ਡੌਲਰੀਆ ਪਿੰਡ'' ਕਿਹਾ ਜਾਂਦਾ ਹੈ। ਜਿੱਥੇ ਬਾਹਰਲੇ ਦੇਸ਼ਾਂ ਤੋਂ ਡਾਲਰ ਆਉਂਦੇ ਹਨ।
ਇਹ ਪਿੰਡ ਪਟੇਲਾਂ ਦੇ ਪਿੰਡਾਂ ਵਜੋਂ ਹੀ ਜਾਣੇ ਜਾਂਦੇ ਹਨ ਕਿਉਂਕਿ ਇੱਥੇ ਪਟੇਲ ਭਾਈਚਾਰੇ ਵਿੱਚ ਆਪਸਦਾਰੀ ਵਿੱਚ ਵੀ ਵਿਆਹ ਕਰਵਾਏ ਜਾਂਦੇ ਹਨ।
ਆਰਐੱਸ ਪਟੇਲ ਅੱਗੇ ਕਹਿੰਦੇ ਹਨ, ''ਜੋ ਲੜਕੇ ਪੈਸਾ ਕਮਾਉਣ ਵਿਦੇਸ਼ ਜਾਂਦੇ ਹਨ, ਉਨ੍ਹਾਂ ਨੂੰ ਉੱਥੇ ਪਹਿਲਾਂ ਤੋਂ ਵਸੇ ਹੋਏ ਪਟੇਲ ਤੁਰੰਤ ਆਪਣੇ ਕੋਲ ਕੰਮ 'ਤੇ ਰੱਖ ਲੈਂਦੇ ਹਨ। ਇਸ ਤਰ੍ਹਾਂ ਇੱਥੋਂ ਦੇ ਨੌਜਵਾਨ ਚੰਗੇ ਜੀਵਨ ਦੀ ਆਸ ਵਿੱਚ ਵਿਦੇਸ਼ ਜਾਂਦੇ ਹਨ। ਘੱਟ ਪੜ੍ਹੇ-ਲਿਖੇ ਲੋਕ ਆਪਣੀ ਜ਼ਿੰਦਗੀ ਦਾਅ 'ਤੇ ਲਗਾ ਕੇ ਉੱਥੇ ਜਾਂਦੇ ਹਨ।''
ਬੀਬੀਸੀ ਗੁਜਰਾਤੀ ਨੇ ਘਟਨਾ ਦੇ ਬਾਰੇ ਵਿੱਚ ਡਿੰਗੂਚਾ ਪਿੰਡ ਦਾ ਦੌਰਾ ਕੀਤਾ।
ਕੁਝ ਲੋਕਾਂ ਨੇ ਬੀਬੀਸੀ ਗੁਜਰਾਤੀ ਨੂੰ ਦੱਸਿਆ ਕਿ ਜੇ ਪਿੰਡ ਤੋਂ ਕਿਸੇ ਪਿਰਵਾਰ ਵਿੱਚੋਂ ਕੋਈ ਵੀ ਵਿਅਕਤੀ ਅਮਰੀਕਾ ਨਾ ਗਿਆ ਹੋਵੇ ਤਾਂ ਲੋਕ ਉੱਥੇ ਵਿਆਹ ਕਰਨ ਤੋਂ ਝਿਜਕਦੇ ਹਨ।
ਇੱਕ 50 ਸਾਲਾ ਵਿਅਕਤੀ ਨੇ ਨਾਮ ਨਾ ਛਾਪਣ ਦੀ ਸ਼ਰਤ 'ਤੇ ਦੱਸਿਆ ਕਿ ''ਮੇਰਾ ਬੇਟਾ 35 ਸਾਲ ਦਾ ਹੈ ਪਰ ਮੇਰੇ ਪਰਿਵਾਰ ਵਿੱਚੋਂ ਕੋਈ ਵੀ ਵਿਅਕਤੀ ਅਮਰੀਕਾ ਵਿੱਚ ਨਹੀਂ ਰਹਿੰਦਾ ਹੈ।''
ਇਸ ਪਿੰਡ ਵਿੱਚ ਪਲਣ ਵਾਲਾ ਹਰ ਬੱਚਾ ਦੂਜੇ ਦੇਸ਼ ਵਿੱਚ ਵਸਣ ਦਾ ਸੁਪਨਾ ਦੇਖਦਾ ਹੈ। ਇੱਥੇ ਲਗਭਗ ਹਰ ਬੱਚਾ, ਅਮਰੀਕੀ ਵੀਜ਼ੇ ਦੀਆਂ ਕਿਸਮਾਂ ਬਾਰੇ ਜਾਣਦਾ ਹੈ।
ਵਿਜ਼ਿਟਰ ਵੀਜ਼ਾ ਤੋਂ ਗ੍ਰੀਨ ਕਾਰਡ ਤੱਕ ਯਾਤਰਾ ਕਿਵੇਂ ਕਰੀਏ, ਇਸ ਬਾਰੇ ਵੀ ਯੋਜਨਾਵਾਂ ਹਨ। ਪਿੰਡ ਵਿੱਚ ਜ਼ਿਆਦਾਤਰ ਬਜ਼ੁਰਗ ਰਹਿੰਦੇ ਹਨ ਕਿਉਂਕਿ ਜ਼ਿਆਦਾਤਰ ਨੌਜਵਾਨ ਵਿਦੇਸ਼ ਚਲੇ ਗਏ ਹਨ।
ਇੱਕ ਪਿੰਡ ਵਾਸੀ ਨੇ ਕਿਹਾ, ''ਪਿੰਡ ਵਿੱਚ ਜ਼ਿਆਦਾਤਰ ਲੋਕ ਬਜ਼ੁਰਗ ਹਨ ਕਿਉਂਕਿ ਉਨ੍ਹਾਂ ਦੇ ਬੱਚੇ ਅਮਰੀਕਾ ਚਲੇ ਗਏ ਹਨ।''
ਇਸ ਤੋਂ ਇਲਵਾ ਇੱਕ ਪਿੰਡ ਵਾਸੀ ਨੇ ਦੱਸਿਆ.''ਪਿੰਡ ਵਿੱਚ ਹੁਣ ਉਹੀ ਲੋਕ ਰਹਿ ਗਏ ਹਨ ਜਿਨ੍ਹਾਂ ਕੋਲ ਵਿਦੇਸ਼ ਜਾਣ ਲਈ ਪੈਸੇ ਨਹੀਂ ਹਨ।''
ਇਹ ਵੀ ਪੜ੍ਹੋ:
ਇਸ ਲੇਖ ਵਿੱਚ Google YouTube ਤੋਂ ਮਿਲੀ ਸਮੱਗਰੀ ਸ਼ਾਮਲ ਹੈ। ਕੁਝ ਵੀ ਡਾਊਨਲੋਡ ਹੋਣ ਤੋਂ ਪਹਿਲਾਂ ਅਸੀਂ ਤੁਹਾਡੀ ਇਜਾਜ਼ਤ ਮੰਗਦੇ ਹਾਂ ਕਿਉਂਕਿ ਇਸ ਵਿੱਚ ਕੁਕੀਜ਼ ਅਤੇ ਦੂਜੀਆਂ ਤਕਨੀਕਾਂ ਦਾ ਇਸਤੇਮਾਲ ਕੀਤਾ ਹੋ ਸਕਦਾ ਹੈ। ਤੁਸੀਂ ਸਵੀਕਾਰ ਕਰਨ ਤੋਂ ਪਹਿਲਾਂ Google YouTube ਕੁਕੀ ਪਾਲਿਸੀ ਤੇ ਨੂੰ ਪੜ੍ਹਨਾ ਚਾਹੋਗੇ। ਇਸ ਸਮੱਗਰੀ ਨੂੰ ਦੇਖਣ ਲਈ ਇਜਾਜ਼ਤ ਦੇਵੋ ਤੇ ਜਾਰੀ ਰੱਖੋ ਨੂੰ ਚੁਣੋ।
End of YouTube post
