You’re viewing a text-only version of this website that uses less data. View the main version of the website including all images and videos.
ਪ੍ਰੈੱਸ ਰਿਵੀਊ꞉ ਟ੍ਰੈਵਲ ਏਜੰਟ ਦੇ ਠੱਗੇ ਨੌਜਵਾਨ ਵੱਲੋਂ ਖ਼ੁਦਕੁਸ਼ੀ
ਜਲੰਧਰ ਦੇ ਇੱਕ 30 ਸਾਲਾ ਨੌਜਵਾਨ ਨੇ ਟ੍ਰੈਵਲ ਏਜੰਟ ਤੋਂ ਧੋਖਾ ਖਾਣ ਮਗਰੋਂ ਖ਼ੁਦਕੁਸ਼ੀ ਕਰ ਲਈ।
ਹਿੰਦੁਸਤਾਨ ਟਾਈਮਜ਼ ਦੀ ਖ਼ਬਰ ਮੁਤਾਬਕ ਰਾਜਨ ਸਿੰਘ ਨੇ ਆਪਣੇ ਘਰ ਵਿੱਚ ਫਾਹਾ ਲੈ ਕੇ ਆਪਣੀ ਜਿੰਦਗੀ ਖ਼ਤਮ ਕਰ ਲਈ। ਉਸ ਨੇ ਇੱਕ ਟ੍ਰੈਵਲ ਏਜੰਟ ਜਿਸ ਦੀ ਪਛਾਣ ਮਨਜੀਤ ਸਿੰਘ ਵਜੋਂ ਹੋਈ ਹੈ ਰਾਹੀਂ ਅਮਰੀਕਾ ਜਾਣਾ ਸੀ ਪਰ ਏਜੰਟ ਨੇ ਉਸ ਨੂੰ ਮਾਸਕੋ (ਰੂਸ) ਭੇਜ ਦਿੱਤਾ।
ਮਰਹੂਮ ਦੇ ਭਰਾ ਮੁਤਾਬਕ ਪਰਿਵਾਰ ਨੇ 13 ਲੱਖ ਰੁਪਏ ਟ੍ਰੈਵਲ ਏਜੰਟ ਨੂੰ ਅਡਵਾਂਸ ਦਿੱਤੇ ਸਨ। ਤਿੰਨ ਮਹੀਨੇ ਮਾਸਕੋ ਬਿਤਾਉਣ ਮਗਰੋਂ ਰਾਜਨ ਵਾਪਸ ਆ ਗਿਆ ਸੀ, ਜਿੱਥੋਂ ਟ੍ਰੈਵਲ ਏਜੰਟ ਦੇ ਵਾਅਦੇ ਮੁਤਾਬਕ ਉਸ ਨੂੰ ਅੱਗੇ ਅਮਰੀਕਾ ਭੇਜਿਆ ਜਾਣਾ ਸੀ।
ਜੰਮੂ-ਕਸ਼ਮੀਰ ਵਿੱਚ ਬਲੈਕ ਕੈਟ ਕਮਾਂਡੋ
ਜੰਮੂ-ਕਸ਼ਮੀਰ ਵਿੱਚ ਅੱਤਵਾਦ ਵਿਰੋਧੀ ਮੁਹਿੰਮ ਦਾ ਹਿੱਸਾ ਹੋਣ ਐੱਨਐੱਸਜੀ ਕਮਾਂਡੋ ਹੋਣਗੇ।
ਦਿ ਟ੍ਰਿਬਿਊਨ ਦੀ ਖ਼ਬਰ ਮੁਤਾਬਕ ਨੈਸ਼ਨਲ ਸਕਿਉਰਿਟੀ ਗਾਰਡ ਦੇ ਦਰਜਨ ਤੋਂ ਵੱਧ ਕਮਾਂਡੋ ਸ਼੍ਰੀਨਗਰ ਸ਼ਾਹਿਰ ਦੇ ਬਾਹਰਵਾਰ ਮੁਕਾਮੀ ਹਮਹਮਾ ਕੈਂਪ ਵਿੱਚ ਅਭਿਆਸ ਕਰ ਰਹੇ ਹਨ।
ਇਹ ਕਮਾਂਡੋ ਸੁਰੱਖਿਆ ਦਸਤਿਆਂ ਦੇ ਜਾਨੀ ਨੁਕਸਾਨ ਨੂੰ ਘਟਾਉਣ ਲਈ ਤੈਨਾਤ ਕੀਤੇ ਗਏ ਹਨ। ਸਾਲ 2017 ਤੋਂ ਲੈ ਕੇ ਹੁਣ ਤੱਕ ਘੱਟੋ-ਘੱਟ 116 ਫੌਜੀਆਂ ਦੀ ਮੌਤ ਹੋ ਚੁੱਕੀ ਹੈ।
ਇੱਕਜੁਟਤਾ ਦਿਖਾਉਣ ਪਹੁੰਚੇ ਆਪ ਆਗੂ ਉਲਝੇ
ਖਣਨ ਮਾਫੀਆ ਵੱਲੋਂ ਕੁੱਟੇ ਗਏ ਆਪ ਵਿਧਾਨ ਸਭਾ ਮੈਂਬਰ ਅਮਰਜੀਤ ਸਿੰਘ ਸੰਦੋਆ ਦਾ ਹਾਲ ਚਾਲ ਪੁੱਛਣ ਮਗਰੋਂ ਆਪ ਆਗੂ ਚੰਡੀਗੜ੍ਹ ਵਿੱਚ ਪ੍ਰੈਸ ਕਾਨਫਰੰਸ ਦੌਰਾਨ ਆਪਸ ਵਿੱਚ ਹੀ ਉਲਝੇ।
ਦੈਨਿਕ ਭਾਸਕਰ ਦੀ ਖ਼ਬਰ ਮੁਤਾਬਕ ਵਿਧਾਨ ਸਭਾ ਵਿੱਚ ਵਿਰੋਧੀ ਧਿਰ ਦੇ ਆਗੂ ਸੁਖਪਾਲ ਸਿੰਘ ਖਹਿਰਾ ਵੱਲੋਂ ਡਾ. ਬਲਬੀਰ ਸਿੰਘ ਦਾ 'ਰਫਰੈਂਡਮ 2020' ਮਾਮਲੇ ਵਿੱਚ ਫੋਨ ਨਾ ਚੁੱਕਣ ਅਤੇ ਟਵੀਟ ਕਰਨ ਦੇ ਮਾਮਲੇ ਕਰਕੇ ਉਲਝੇ।ਕੁਝ ਦੇਰ ਬਾਅਦ ਖਹਿਰਾ ਪ੍ਰੈਸ ਕਾਨਫਰੰਸ ਛੱਡ ਕੇ ਚਲੇ ਗਏ।
ਸ਼ੁਤਰਾਣਾ ਰੇਪ ਕੇਸ ਮੁਲਜ਼ਮ ਕਾਬੂ
ਸ਼ੁਤਰਾਣਾ ਦੇ ਇੱਕ ਪਿੰਡ ਵਿੱਚ ਨਾਬਾਲਗ ਨਾਲ ਜਬਰ ਜਨਾਹ ਕਰਨ ਅਤੇ ਉਸ ਦੇ ਭਰਾ ਦਾ ਕਤਲ ਕਰਨ ਵਾਲੇ ਤਿੰਨ ਮੁਲਜ਼ਮਾਂ ਨੂੰ ਪੁਲਿਸ ਨੇ ਕਾਬੂ ਕਰ ਲਿਆ ਹੈ।
ਪੰਜਾਬੀ ਟ੍ਰਿਬਿਊਨ ਦੀ ਖ਼ਬਰ ਮੁਤਾਬਕ ਮੁਲਜ਼ਮਾਂ ਨੇ ਲੜਕੀ ਨਾਲ ਬਲਾਤਕਾਰ ਕੀਤਾ ਜਿਸ ਨੂੰ ਉਸਦੇ ਛੋਟੇ ਭਰਾ ਨੇ ਦੇਖ ਲਿਆ ਜਿਸ ਕਰਕੇ ਉਨ੍ਹਾਂ ਨੇ ਲੜਕੇ ਨੂੰ ਮਾਰ ਕੇ ਪੱਖੇ ਨਾਲ ਲਟਕਾ ਦਿੱਤਾ।
ਅਦਾਲਤ ਨੇ ਤਿੰਨਾਂ ਨੂੰ ਪੰਜ ਦਿਨਾਂ ਦੀ ਨਿਆਂਇਕ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ।
ਆਪਣੇ ਪਸੰਦੀਦਾ ਅਧਿਆਪਕ ਦੀ ਵਿਦਿਆਰਥੀਆਂ ਨੇ ਕੀਤੀ ਘੇਰਾਬੰਦੀ!
ਤਾਮਿਲਨਾਡੂ ਦੇ ਇੱਕ ਸਰਕਾਰੀ ਹਾਈ ਸਕੂਲ ਦੇ ਅਧਿਆਪਕ ਨੂੰ ਉਸ ਦੇ ਹੀ ਸਕੂਲ ਦੇ ਵਿਦਿਆਰਥੀਆਂ ਨੇ ਬੰਦੀ ਬਣਾਇਆ। ਕਿਉਂਕੀ ਵਿਦਿਆਰਥੀਆਂ ਨੂੰ ਅੰਗੇਰੇਜ਼ੀ ਦੇ ਟੀਚਰ ਦਾ ਤਬਾਦਲਾ ਮਨਜ਼ੂਰ ਨਹੀਂ ਸੀ।
ਦਿ ਇੰਡੀਅਨ ਮੁਤਾਬਕ ਤਿਰੁਵਲੂਰ ਹਾਈ ਸਕੂਲ ਦੇ ਵਿਦਿਆਰਥੀਆਂ ਨੇ ਇਹ ਕੰਮ ਉਸ ਸਮੇਂ ਕੀਤਾ ਜਦੋਂ ਉਨ੍ਹਾਂ ਨੂੰ ਪਤਾ ਲੱਗਿਆ ਕਿ ਉਨ੍ਹਾਂ ਦੇ ਅਧਿਆਪਕ ਦੀ ਬਦਲੀ ਕਿਸੇ ਹੋਰ ਸਕੂਲ ਵਿੱਚ ਕਰ ਦਿੱਤੀ ਗਈ ਹੈ।
ਇਸ ਅਣਕਿਆਸੇ ਘਟਨਾਕ੍ਰਮ ਕਰਕੇ ਸੂਬੇ ਦੇ ਸਿੱਖਿਆ ਵਿਭਾਗ ਨੂੰ 28 ਸਾਲਾ ਅੰਗਰੇਜ਼ੀ ਅਧਿਆਪਕ ਜੀ ਭਗਵਾਨ ਦੀ ਬਦਲੀ 10 ਦਿਨਾਂ ਲਈ ਟਾਲਣੀ ਪਈ।
