ښاغلي نيگروپونتي وايي له ولسمشر مشرفه يې د هغې ژمنې د پوره کولو غوښتنه هم کړې چې د پوځ له مشرۍ څخه لاس واخلي

د امريکا د بهرنيو چارو مرستيال وزير جان نيگروپونتي ټينگار وکړ چې مخکې له دې چې د راتلونکي جنورۍ د مياشتې ټاکنې راورسېږي، جنرال مشرف بايد اوضاع عادي حالت ته راوگرځوي.

ښاغلي نيگروپونتي وويل: '' بېړنى حالت له ازادو، عادلانه او باوري ټاکنو سره سر نه خوري.''

دۀ وويل له ولسمشر مشرف نه يې همدا ډول غوښتي چې پر خپلې هغې ژمنې ودرېږي چې د پوځ له مشرۍ څخه لاس پر سر شي او خپل سياسي مخالفين خوشي کړي.

بېړنى حالت له ازادو، عادلانه او باوري ټاکنو سره سر نه خوري د امريکا د بهرنيو چارو مرستيال وزير، جان نيگروپونتي

دۀ وويل: '' په تازه وختونو کې د اعتراض کوونکو پر ضد گامونه، د رسنيو ځپل او د بشري حقونو او سياسي مشرانو نيول مخامخ د هغو سمونونو پر خلاف کارونه دي چې په وروستيو کلونو کې پيل شوي وو.''

د امريکا د بهرنيو چارو مرستيال وزير همدا ډول جنرال مشرف د ترهگرۍ ضد جگړې په جبهه کې د يوۀ ټينگ ملگري په توگه وستايل.

مخکې د جنرال مشرف يوۀ مرستيال ويلي و چې ولسمشر ښاغلي نيگروپونتي ته په گوته کړې چې اساسي قانون يوازې هغه مهال بېرته پرځاى کېدى شي چې قانون او نظم پرځاى شي.

جنرال مشرف دوه اوونۍ مخکې بېړني حالت وروسته له هغۀ اعلان کړ چې په هېواد کې يې د اورپکو لخوا تاوتريخوالى او سياسي جنجالونه مخ پر زياتېدو و.