د بېړني حالت له اعلانولو وروسته د د مشرف لومړى خبري کنفرانس و

مشرف ويلي چې ولايتي او مرکزي شورا ګانې به په راتلونکو څو اوونيو کې منحلې شي او پارلماني ټاکنی په يوه ورځ تر سره شي.

نوموړی د ټاکنو کمېسيون ته دنده سپارلې چې ټاکنو ته پوره چمتووالی ونيسي او له خپل لورې يې ډاډ ښوولى چې که د جنوري په لومړۍ اوونۍ کې هم ټاکنې تيارې شي دى ورسره موافق دى. هغۀ وويل دا اوس په هغوى پورې اړه لري چې د ټاکنو دقيقه نېټه اعلان کړي .

مخکې داسې اوازې وې چې ښايي پارلماني ټاکنې له خپل مهالوېش څخه يو څۀ وروسته ترسره شي.

زۀ به د ټاکنو له کمېسيون څخه وغواړم چې څومره ژر او څومره چټک چې کېداى شي ټاکنې ترسره کړي ولسمشر مشرف

جنرال مشرف څۀ باندې يوه اوونۍ مخکې د بېړني حالت له اعلانولو وروسته خپل لومړني خبري کنفرانس ته خبرې کولې.

دۀ وويل: '' زۀ به د ټاکنو له کمېسيون څخه وغواړم چې څومره ژر او څومره چټک چې کېداى شي ټاکنې ترسره کړي.''

ولسمشر مشرف اتۀ ورځې مخکې په هېواد کې بېړنى حالت اعلان کړ، اساسي قانون يې وځنډاوۀ او قاضي القضات يې له دندې گوښه کړ. د دۀ مخالفينو په پرلپسې توگه د بېړني حالت د پاى ته رسولو لپاره غږى کړى.