نرېندرا مودي: اوبه او وینې یو ځای نه شي بهیدای

د هند لومړي وزیر نرېندرا مودي د خپل هېواد د کرنې او اوبو اړوند چارواکو سره خبرو کې هوډ څرګند کړی، چې د هند او پاکستان تر منځ د اوبو د وېش هوکړې ' سند طاس ' په اړه به له سره غور وکړي.

د هندي رسنیو په رپوټونو کې ویل شوي، چې له غونډې وروسته ښاغلي مودي وویل:

'' وینې او اوبه یو ځای نه شي بهیدای.''

دغه هوکړه د هند او پاکستان تر منځ ۱۹۶۰ کال کې لاسلیک شوه، چې له مخې د هغو دریو سیندونو پر اوبو د پاکستان حق منل شوی، چې له کشمیره تېریږي.

دغه سیندونه سند، چناب او جهلم نومیږي، چې پاکستان یې ۸۰ سلنه اوبه کارووي.

غونډه کې د هند ملي امنیت سلاکار اجیت کومار ډ‌وول، د بهرنیو چارو سکرتر ایس جي شنکر او د اوبو وزیر هم ګډون درلود.

د ښاغلي مودي دغه څرګندونې داسې اشاره بلل کېږي، چې ښايي له پاکستان سره د اوبو د وېش پر سر هند په راتلونکي کې د اقدام کولو هوډ لري.

یو شمېر ماهرین په دې باور دي، چې هند هغومره اوبه نه کارووي، چې باید ویې کاروي، خو په وینا یې له دې وروسته به هند د اړتیا وړ اوبه کارووي.

رپوټونو کې ویل شوي، چې هند د اوبو اړوند تولبول نومي پروژې دویم ځلي کار پیل کړی، چې ۲۰۰۷ کال کې یې د پاکستان له اعتراض وروسته پرې کار درولی و.

د هند ' د هندو ' نومي ورځپاڼې په رپوټ کې ویل شوي، هند به تر هغه مهاله له پاکستان سره د ۱۹۶۰ کال دغې هوکړې په اړه خبرې و نه کړي، تر څو چې پاکستان په هند کې د ترهګرۍ سرپرستي نه پریږدي.

د کشمیر په اوړي نومي سیمه کې پر هندي پوځیانو د وسله والو له برید وروسته په هند کې د هغو سیندونو د لوري بدلون غوښتنې ډېرې شوې، چې اوبه یې پاکستان ته بهیږي.

له هغه برید وروسته د هند او پاکستان تر منځ اړیکي لا پسې ترینګلي شوي دي.