امریکا روسیه په حلب کې په 'بربریت' تورنه کړه
د عکس سرچینه، Reuters
په ملګرو ملتونو کې د امریکا استازې روسیه د سوریې په حلب ښار کې د خونړیو بمباریو له کبله په 'بربریت' تورنه کړې ده.
د ملګرو ملتونو امنیت شورا بېړنۍ ناسته کې د امریکا سمانتا پاور وویل، روسیې دغې شورا په سوریه کې د روان وضعیت په اړه تل دروغ ویلي دي.
روسیې ویلي، سوري ځواکونو هڅه کوله چې له حلب ښاره ترهګر وباسي.
د روسیې استازي ویټالي چورکین نه دي ویلي چې د حلب په جګړه کې روسي ځواکونه ښکېل وو.
خو نوموړي وویل، په سرویه کې د سولې راوستل ''اوس تقریباً ناشونی کار دی''. ده مخالفې وسله والې ډلې د اوربند په ماتولو تورنې کړې.
د امریکا استازې ویلي، روسیې په سوریه کې ''وحشیانه'' عمل کړی، نه له ترهګرۍ سره مبارزه.
د عکس سرچینه، AP
اغلې پاور وویل: ''ډاډه اوسئ چې روسیه په سوریه کې د خپلو فعالیتونو په اړه رښتیا نه وايي.''
پر همدې مهال، د فرانسې د بهرنیو چارو وزیر ژان مارک ارو هم د امنیت شورا ناسته کې وویل، که ایران او روسیه د سوریې اوږدمهالې جګړې ته دوام ورکړي، د سوریې جنګي جنایتونو کې به دوی هم شریک شي.
د عکس سرچینه، epa
ښاغلي ارو د یکشنبې په ورځ (سپټمبر ۲۵مه) دې ته په اشارې سره چې ایران او روسیه د سوري ولسمشر بشارالاسد ملاتړي دي، وویل دوی دې له خپلې خونړۍ تګلارې لاس واخلي.
د فرانسې د بهرنیو چارو وزیر دا هم وویل، که ایراني او روسي چارواکي دا کار نه کوي نو ''د سوریې د حلب جنګي جرمونو ترسره کولو کې به شریکان وي''.
بریتانیا هم په سوریه کې د روسیې د کړنو په غندلو کې د فرانسې او امریکا ملګرتیا کړې ده.
سوریې ته د ملګرو ملتونو ځانګړي استازي سټیفن ډي میستورا ویلي، د حلب ښار اورپکو تر واک لاندې سیمو کې اوس وحشت او وېره خپره شوې ده.
ښاغلي ډي میسټورا زیاته کړه، که د سوریې دولت وغواړي د حلب دغه برخې په زور ونیسي، نو دغه ټول لرغونی ښار به ویجاړ شي.
د ملګرو ملتونو د بشري چارو مشر یان ایګلنډ هم وړاندې ویلي وو، حلب کې د حکومت مخالفو وسله والو تر واک لاندې سیمو کې باید بریدونه او بمبارۍ ودرول شي او مرستندویه کاروان ته هلته د ورتګ اجازه ورکړل شي.
د عکس سرچینه، AFP
پر همدې مهال، د سوریې د حکومت ۳۳ مخالفو ډلو په یوه ګډه خبرپاڼه کې ویلي، روانې خبرې بې ګټې دي او روسیه باید له دې خبرو ووځي.
تېره اونۍ د اوربند له ماتېدو وروسته د سوریې او روسیې د جنګي الوتکو بریدونه ډېر شوي دي.
د عکس سرچینه، Getty Images
امریکا او روسیه یو پر بل د مرستو پر کاروانونو د بریدونو تورونه لګوي.
وړاندې د ملګرو ملتونو سرمنشي بان کي مون حلب کې د پوځي تاوتریخوالو د ډېرېدو په اړه ''خواشیني'' ښودلې وه.
