د جرمني پارلمان ترکیه کې د ارمنیانو وژنه 'نسل وژنه' وبلله
د عکس سرچینه، Reuters
د جرمني پارلمان (بونډستاګ) د یوه پرېکړه لیک په تصویبولو سره په ترکیه کې د عثماني خلافت پرمهال د ارمنیانو وژنه "نسل وژنه وبلله".
د جرمني لومړۍ وزیرې انګیلا میرکل د رایو ورکولو پرمهال په پارلمان کې نه وه، که څه هم د دیموکراتو مسیحیانو حاکم ایتلاف او سوسیال دیموکراتانو له دې پرېکړه لیک ملاتړ کړی دی. د حاکم ګوند د ایتلاف غړي زرغون ګوند ددې پرېکړه لیک مسوده برابره کړه.
د کډوالو پر سر د اروپایي ټولنې او ترکیې ترمنځ خبرو کې جرمني محوري رول لري او ترکیې خبرداری ورکړی چې د ارمنیانو وژنه، نسل وژنه وبلل شي، د جرمني او ترکیې ترمنځ اړیکې زیانمنوي.
ارمنیان وایي، په ۱۹۱۵ کال کې د اوسني ترکیې ۱،۵ میلیونه ارمنیان د عثماني امپراتورۍ د پوځ د اقداماتو له امله وژل شوي او مړه شوي دي.
ترکیه دا شمېره ناسمه بولي او د ارمني اقلیت توکمیزې تصفیې لپاره پلان شوی خوځښت ردوي. ترکیه همداراز پردې ټینګار کوي چې د عثماني ترکیې په نسکورېدو مهال کړکېچونو کې ډېرو ترکانو هم خپل ژوند بایللی دی.
د عکس سرچینه، AFP
