ايهود اولمرت د بډو اخيستو له امله په بند محکوم شو
د عکس سرچینه، AP
د اسراييلو سترې محکمې د دغه هېواد يو مخکنی لومړی وزير ايهود اولمرت د بډو اخيستو په تړاو په يو نيم کلن بند محکوم کړی دی.
۷۰ کلن ايهود اولمرت په ۲۰۱۴ کال کې د ابتدايه محکمې له لوري په شپږ کاله بند محکوم شو، خو سترې محکمې يې د بند دغه موده ۱۸ مياشتو ته راښکته کړه.
ايهود اولمرت له ۲۰۰۶ تر ۲۰۰۹ کال پورې د اسراييلو لومړی وزير و، خو د بډو اخيستو تورونه يې د هغه مهال دي چې دی د بيت المقدس ښاروال و.
ده هغه مهال يوه ودانيز شرکت ته د جواز ورکولو په بدل کې بيا بيا بډې اخيستې وې.
ښاغلی اولمرت به د اسراييلو لومړنی صدراعظم وي چې بند تېروي.
د ده د زندان تېرولو موده د راتلونکي ۲۰۱۶ کال له فبرورۍ مياشتې پيلېږي.
