د سوریې د بحران په اړه د نړیوالو ترمنځ اختلافات
د ملګروملتونو په عمومي غونډه کې د نړیوالو مشرانو ترمنځ د سوریې د بحران د حل لارې په اړه اختلافونه څرګند شوي.
امریکا او فرانسې پر دې ټینګار کړی چې د سوریې ولسمشر بشار الاسد نه شي کولی د سوریې د راتلونکي یوه برخه واوسي.
خو روسیې ویلي چې د "اسلامي دولت" ډلې پر وړاندې د مبارزې لپاره له ښاغلي اسد سره مرسته نه کول به یوه لویه تېر وتنه وي.
د دې عمومي غونډې په څنډه کې د روسیې ولسمشر ولادمیر پوتین د امریکا له ولسمشر باراک اوباما سره لیدنه کړې.
له دې لیدنې وروسته نوموړي وویل، چې کېدای شي روسیه د اسلامي دولت پر وړاندې هوايي عملیاتو کې برخه اخیستو ته لیواله وي.
خو ښاغلي پوتین وویل، دغه هوايي بریدونه باید نړیوال ملاتړ له ځانه سره ولري.
د عکس سرچینه،
دا لومړنۍ دوه اړخیزه لیدنه وه چې په روان کال کې ترسره شوه او د اوکراین په اړه یې هم خبرې وکړې.
ښاغلي اوباما د عمومي اسامبلې غونډه کې وویل، د سوریې د جګړې د حل لپاره چې له ۲۰۰ زره ډېر انسانان یې ووژل او له ۱۱ میلیونو ډېر کسان یې بې کوره کړل د لوی قدرتونو همغږي کېدل اړین دی.
ښاغلي پوتین د سخت دریځۍ ضد یوه لوی ائتلاف غوښتونکی شو، چې د "اسلامي دولت" ډلې سره وجنګېږي، چې د نوموړي په وینا، باید نړیوالو ځواکونو ته ورته وي چې له نازیانو سره وجنګېدل.
په وروستیو کې ځینو لویدیځو مشرانو د ښاغلي اسد پر وړاندې خپل دریځ کې نرمښت را وستی او کیدای شي دا ومني چې د انتقالي دولت په رهبرۍ کې پاتې شي.
تمه کېږي چې د بریتانیا لومړي وزیر دیوید کامیرون د دغې اونۍ په وروستیو کې دا ډوله موضوع مطرح کړي.
د ایران ولسمشر حسن روحاني چې د ښاغلي اسد له اصلي ملاتړو څخه دی ویلي، هېواد یې چمتو دی چې په سوریه کې د دیموکراسۍ د لارو هوارولو لپاره مرسته وکړي.
نوموړي وویل:"هغسې چې په عراق او افغانستان کې د دیموکراسي د رامنځ ته کولو کې مرسته وکړه، چمتو یوو چې په سوریه او یمن کې هم د دیموکراسي لپاره مرستې وکړو".
د عکس سرچینه، AP
خو د فرانسې ولسمشر فرانسوا اولاند وايي، په داسې حال کې چې چمتو دی له ایران او روسیې سره مرسته وکړي خو دوی ته به دا روښانه کړي چې "د سوریې د بحران حل لاره د بشار الاسد په ګډون نه شي ترسره کېدای".
