اردن: له تبادلې مخکې باید د پیلوټ ژوند تایید شي

جاپاني چارواکي د هغه غږیز پیغام شننه کوي، چې ادعا کېږي پکې د جاپاني ژورنالست کینجي کوټو په خوله دویم ځلې د اردني پیلوټ د وژلو ګواښ شوی دی.

پیغام کې ویل شوي، چې که اردن کې عراقۍ بندۍ سخت دریځې خوشي نه شي، پیلوټ معاذ الکساسبه به ووژل شي.

اردن ویلي چمتو دي، چې د خپل پیلوټ خوشي کېدو بدل کې یاده مېرمن خوشي کړي، خو وايي له دې مخکې باید تایید شي، چې پیلوټ ژوندی دی.

د جاپان وزیر یوشي هیدې سوګا وايي موږ هڅه کوو معلومه کړو، خو په غالب ګومان دغه غږ د کینجي ګوتو دی. داعش د اردني پیلوټ او جاپاني ژورنالست د وژلو لپاره ۲۴ ساعته ضرب الاجل ټاکلی و، چې تېر شوی او په کور دننه د جاپان او اردن دواړه حکومتونه له سختو فشارونو سره مخامخ دي.

د معاذ او کینجي وژنې ضرب الاجل د سې شنبې په ورځ په یوه ویډیوي پیغام کې خپور شوی و.

په هغه ویډیو کې کینجي ویلي و، چې که اردن ساجده الرشاوي خوشي نه کړي، ده سره د ژوند ۲۴ ساعته پاتې دي او له اردني پیلوټ سره دې نه لږ وخت دی.

دغه ویډیو کې د تاوان غوښتنه نه ده شوې. داعش له دې مخکې یو برمته شوی هارونایوکاوا وژلی و، چې د هغه بدل کې یې ۲۰ میلیونه ډالره تاوان غوښتی و.

د بي بي سي خبریال فرینک ګارډنر خپل رپوټ کې کاږي، چې اردن حکومت دا مهال له فشار سره مخامخ دی.

دوی باید په ۲۴ ساعتونو کې باید پرېکړه وکړي، چې د پیلوټ خوشي کېدو لپاره القاعده غړې خوشې کړي او که نه.

داعش غواړي د القاعده دغه ښځینه غړې خوشې شي، چې د اعدام په سزا محکومه شوې ده. د دې معانا د ترهګرۍ پر وړاندې د ټیټېدو په توګه اخیستل کېږي.

ګارډنر په خپل رپوټ دغه راز کاږي، چې د اردن ډېری اوسېدونکي د داعش پر هدفونو د امریکا په مشري اییتلاف بمباريو پلوي دي.

خو دوی غواړي پیلوټ یې کور ته ستون شي او اردن د داعش خلاف جګړه کې برخه وانخلي.

د سې شنبې په ورځ د برمته شوي پیلوټ یو شمېر خپلوانو د اردن لومړي وزیر کور مخکې مظاهره وکړه او غوښتنه یې کوله، چې باید د داعش غوښتنې ومنلې شي.