اوکراين کې خونړۍ شخړې وشوې
د اوکراین په پلازمېنه کیف کې د پولیسو او مظاهره چیانو ترمنځ خونړۍ شخړې وشوې چې لږترلږه ۷ کسان په کې وژل شوي دي.
د ۳۰ مظاهره چیانو په ګډون د ګڼو کسانو د ټپي کېدو خبر هم ورکړل شوی دی.
په ټپیانو کې د کورنیو چارو د وزارت اوه تنه کارکوونکي او یو عکاس هم شامل دی.
پولیسو د زرګونو هغو مظاهره چیانو د مخنیوي لپاره چې د پارلمان په لور روان وو ربړي ګولې او لاسي بمونه چې لوګي خپروي وکارول.
دغه مهال په پارلمان کې په اساسي قانون کې د بدلونونو په اړه بحث روان و.
دغه راز مظاهره کوونکو هڅه وکړه چې د واکمن ګوند پر دفتر هم ورشي خو پولیسو یې مخه ونیوله.
د دې بدلونونو له مخې به د ولسمشر ویکتور یناکویچ واکونه کم شي.
که د ۲۰۰۴ کال په اساسي قانون کې بدلونونه راوستل شي نو د ولسمشر پرځای به پارلمان صدراعظم، د کابینې اکثره غړي او سیمه ییز والیان ټاکي.
مخالفینو خبرداری ورکړی و چې که په دې برخه کې اقدام ونه شي نو د حکومت ضد پراخې مظاهرې به لا پسې پراخې شي.
دې مظاهرو له یو څه مودې آرامې وروسته اوس بیا زور اخیستی دی.
اوکراین کې د حکومت ضد مظاهرې د نومبر په میاشت کې وروسته له هغه پېل شوې چې ولسمشر یناکویچ له اروپايي اتحادیې سره د آزادې سوداګرې پرځای له روسیې نه د پور اخیستلو پلوي وکړه.
د روسیې د بهرنیو چارو وزارت په اوکراین کې وروستی تاوتریخوالی د لویدیځوالو سیاستوالو د لاسوهنې پایله بللې.
روسیې او اروپايي اتحادیې یو بل تورن کړي چې په اوکراین کې لاسوهنې کوي.
