د تصویرونو البوم؛ امریکا کې د سمندري توفان له کبله رامنځته شوې ورانۍ، ویجاړۍ

ایډالیا نومي سمندري توفان د امریکا په فلوریډا ایالت کې د پراخو ورانیو، ویجاړیو له رامنځته کولو وروسته د دې هېواد جورجیا ایالت پر لور روان دی.

په فلوریډا کې ۲۸۰ زره کسان له همدې کبله برېښنا نه لري او خلکو ته خبرداری ورکړل شوی چې د برېښنا له مزیو سره احتیاط وکړي.

د فلوریډا په ځینو سیمو کې د توفان له کبله سېلابي اوبه هم ساحلي سیمو ته ننوتې دي. د فلوریډا والي رون ديسانتیس وايي، داسې احتمال شته چې تر ۱۶ فوټه (څلور اعشاریه اته متره) پورې لوړې سمندري څپې د همدې توپان له کبله وچې ځمکې ته وخېژي.

دلته د فلوریډا یو شمېر تصویرونه وینو چې پر چهارشنبه اخیستل شوي دي.

فلوریډا والي وايي، د مرستې چارې رواني دي، خو سملاسي د سر زیان داسې رپوټونه نه شته چې مخکینۍ شمېرې بدلې کړې.

له دې مخکې د لویو لارو ګزمې ادارې ویلي و، دوه کسان د توفان له کبله په ترافیکي پېښه کې وژل شوي دي.

د والي په وینا ایالتي حکومت به د ځینو سیمو په پاکولو کې مرسته وکړي، چې ځايي ښاروالۍ یې په دې چاره کې مرستې ته اړتیا لري.

د ځینو هغو ساحلي سیمو اوسېدونکي د سرپناه موندلو لپاره له کورونو وتلي دي، چې له توفان سره له سمندره راختلې اوبه یې په سېلابي بڼه پر کورونو ورغلې.

د ټولو تصویرونو حقونه خوندي دي.