پوتین په یوه ناڅاپي سفر د اوکرایین ماریوپول ښار ته تللی
د عکس سرچینه، Reuters
د روسیې دولتي رسنۍ وايي، ولسمشر ولادیمیر پوتین د اوکرایین ساحلي ښار ماریوپول ته په ناڅاپي سفر تللی دی.
یاد ښار د روسیې یرغل پر مهال سخت ویجاړ شوی و.
ماریوپول اوس د روسیې تر واک لاندې دي.
په یوه ویډیو کې لیدل کېږي چې پوتین د ښار په سړکونو د شپې لخوا موټر چلوي او له ځایي خلکو سره خبرې کوي.
بي بي سي د دې ویډیو ځای نه تایید وي.
داسې انګېرل کېږي چې دا به یرغل شوې سیمې ته د پوتین لومړی سفر وي.
یو شمېر رسنۍ وايي، ښاغلی پوتین هلته په چورلکه کې تللی و.
ماریوپول له لسو میاشتو راهیسې د روسیې تر یرغل لاندې وو او د یوې خونړۍ او اوږدې جګړې له امله سخت ویجاړ شوی دی.
د عکس سرچینه، Reuters
اوکرایین وايي، د جګړې پر مهال هلته له ۲۰ زرو ډېر کسان وژل شوي.
د ملګرو ملتونو د ارزونو له مخې د یاد ښار ۹۰ سلنه ودانۍ ویجاړې شوي او شاوخوا ۳۵۰ زره کسان ترې کډه شوي دي.
له جګړې وړاندې د ماریوپول ښار د وګړو شمېر پنځه سوه زره وو.
د سیمې یوه ډله خلک وايي، روسیې د ښار بیا رغونې لپاره کمپاین پیل کړی او د خلکو زړونه یې خپل کړي.
له دې کړنو یې موخه دا ده چې ماریوپول د روسیې له خاورې سره یو ځای کړي او د خپل هېواد برخه یې کړي.
روسي چارواکي وايي، اوس هلته درې سوه زره کسان ژوند کوي.
پر ماریوپول د خونړیو بریدونو په لړ کې، یو هم د دې ښار په تیاتر برید و چې شاوخوا درې سوه کسان پکې ووژل شول.
هلته په تیاتر کې ولسي وګړو پناه اخیستې وه.
اوکرایین او د بشري حقونو سازمانونو دغه برید یو جنګي جنایت بللی دی.
د عکس سرچینه، Reuters
ملګرو ملتونو ویلي، دا د هغو پېښو له ډلې ده، چې ولسمشر پوتین او د هغه حکومت یې په قانوني توګه مسؤل بلل کېږي.
د جرمونو نړیوالې محکمې (ICC) د روسیې د ولسمشر ولادیمیر پوتین د نیولو امر کړی دی.
نوموړی په اوکرایین کې په جنګي جرمونو تورن دی.
یادې محکمې د جنګي جرمونو او په ځانګړې توګه له اوکرایینه روسیې ته د ماشومانو ناقانوني لېږد په تور د د روسیې د ولسمشر د نیولو امر کړی.
محکمې ویلي، دا جنایتونه وروسته له هغه شوي چې روسیې د ۲۰۲۲ کال د فبرورۍ په ۲۴ مه پر اوکرایین برید وکړ.
مسکو دا تورونه رد کړي او د پوتین پر ضد یې د نیولو امر «یرغل» بللی دی.
د جرمونو نړيواله محکمه یوازې دا ډول امر کولی شي خو د تورن کس د نيولو واک نه لري.
د عکس سرچینه، Reuters
یاده محکمه یوازې په غړو هیوادونو کې خپل واک ترسره کولی شي او روسیه د ای سي سي غړیتوب نه لري، خو دا خبر کولای شي د روسیې پر ولسمشر له نورو اړخونو اغېزه وکړي، د بېلګې په توګه د نوموړي د نړیوالو سفرونو مخه نیول.
د ای سي سي له خوا د روسیې د ولسمشر د نیولو حکم د روسیې توند غبرګونون پارولی.
خو په روسیه کې د اپوزیسیون مشرانو د ای سي سي دا ګام ستایل دی.
د اوکرایین ولسمشر ولادیمیر زیلینسکي هم د ای سي سي دد دې کار ستاینه کړې ده.
