لیز ټرس بریتانیا کې د محافظه کار ګوند مشره شوه او د دې هېواد لومړۍ وزیره ټاکل کېږي
د عکس سرچینه، Reuters
د یوه رسمي اعلان له مخې د بریتانیا بهرنیو چارو پخوانۍ وزیره لیز ټرس د دغه هېواد د محافظه کار ګوند مشره شوه او لومړۍ وزیره به وټاکل شي، چې د اوسني لومړي وزیر بورېس جانسن ځای به ونیسي.
آغلې ټرس په ګوند کې دننه دغه سیالۍ کې له خپل سیال رشي سونک زیاتې رایې اخیستې او د څه باندې ۸۰۰۰۰ رایو په اخیستو سره د ټاکنو ګټونکې اعلان شوه.
د رسمي شمېرو له مخې دغه سیالۍ کې ګډون پراخ و، ټولټال ۸۲،۶ سلنه رایه کارول شوې وې چې ۵۷ سلنه یې د مېرمن ټرس په ګټه کارېدلې وې.
ټاکل شوې چې آغلې ټرس سبا سې شنبه د بریتانیا ملکې لیدو ته ورشي او رسما د برتانیا د لومړۍ وزیرې په توګه چارې ور وسپارل شي.
رسمي شمېرې ښيي چې دغه سیالۍ کې مېرمن ټرس ۸۱۳۲۶ او سیال یې رشي سونک ۶۰۳۹۹ رایې ګټلې دي چې آغلې ټرس د اکثریت رایو په ګټلو سره د دغې سیالۍ ګټونکې اعلان شوې.
آغلې ټروس د پایلو له اعلان وروسته د وینا پر مهال له خپلو د پلویانو مننه کړې او ویلي یې دي:"ویاړم چې د محافظه کار ګوند مشره وټاکل شوم، مننه چې په ما مو باور وکړ او د هېواد مشري مو راوسپارله، ژمنه یم چې په سختو حالاتو کې به زړور اقدامات وکړم."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
لیز په خپلو خبرو کې د بریتانیا د اوسني لومړي وزیر بورېس جانسن د هڅو ستاینه هم وکړه چې د اوکرایین په جګړه کې یې د روسیې ولسمشر ولادمیر پوتین پر وړاندې دریځ غوره کړی او په وینا یې له اروپايي ټولنې د بریتانیا وتلو پروګرام (برېګزيټ) ته یې د پای ټکی کېښود.
لیزو ټرس د خبرو پر مهال بریتانیا کې د مالیاتو د راټیټولو او لګښتونو د کمولو ژمنه تکرار کړه او زیاته یې کړه چې د بریتانیا د اقتصادي ودې لپاره "ځواکمن پلان" لري.
لیز ټرس وروسته له هغې د بریتاینا محافظه کار ګوند مشره او لومړۍ وزیره ټاکل کېږي چې پخوانی لومړی وزیر د ګوند مخالفینو د سختو نیوکو په پایله کې له دندې د استعفا ورکولو اعلان وکړه.
