د هند پولیس: د 'نوپور شرما' د وژلو په نیت له پولې راوښتی پاکستانی مو نیولی
د عکس سرچینه، Getty Images
د هند پولیس وایي یو پاکستانی سړی یې نیولی چې ظاهرآ د دغه هېواد د واکمن "بي جي پي" ګوند د مخکینۍ ویاندې "نوپور شرما" د وژلو لپاره له نړیوالې پولې ور اوښتی و.
نوپور شرما څه موده وړاندې یوه تلویزیوني پروګرام کې د اسلام د ستر پیغمبر خلاف له سپکاوي په ډکه وینا تورنه شوې، چې دغه هېواد کې دننه او بهر یې توند غبرګونونه راوپارول.
هندي پولیسو ویلي چې د رضوان اشرف په نوم دغه ۲۴ کلن پاکستانی د روانې جولای میاشتې د شپاړسمې او اوولسمې ترمنځ پر شپه د راجستان په 'شري ګنګانګر" سیمه کې نیول شوی دی.
د پولیسو په وینا د دې هلک پلار محمد اشرف نومېږي او د پاکستان د 'کتیال شیخ' اوسېدونکی دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
ویل کېږي چې هغه د هند سرحدي ځواکونو نیولی او بیا ځايي پولیسو ته سپارلی دی.
د 'شري ګنګانګر' د پولیسو یوه چارواکي انند شرما بي بي سي ته ویلي چې له رضوان اشرف سره یې دوه چړې، د اوبو بوتل، جامې او څه مذهبي لیکنې نیولې دي.
امنیتي ادارو له هغه څخه د څېړنو لباره یوه ګډه ځانګړې ډله جوړه کړې ده.
د ښاغلي شرما په وینا اشرف د لومړنیو څېړنو پر مهال ویلي چې تر اتم ټولګې یې زدکړې کړې، د برېښنا برخه کې کار کوي، د نوپور شرما څرګندونو ځورولی نو ځکه یې د وژلو په تکل ورغلی دی.
تر دې وړاندې د هند 'ادې پور' ښار کې د جامو یو ګنډونکی له دې کبله وژل شوی و چې د نوپور شرما په ملاتړ یې پر خواله رسنۍ پوست کړی و.
د هند استخباراتي ادارو ویلي چې د دغه خیاط وژونکی 'غوث محمد' هم پاکستان سره اړیکه کې پاتې شوی او په ۲۰۱۴ کال کراچۍ کې د 'اسلامي دعوت' دفتر ته ورغلی و.
د شري ګنګانګر پولیس وایي رضوان اشرف ورته تر اوسه دا نه دي ویلي چې پخپله یې هند ته د ورتګ پرېکړه کړې که د بل چا په لمسون ورغلی.
انند شرما وایي "ترې ومو پوښتل چې ایا د هغې [نوپور شرما] د اوسېدو ځای درته مالوم دی او چېرته تللې؟ خو په هېڅ هم نه پوهېده. ان پر دې هم نه پوهېده چې د هند کومه سیمه کوم ایالت کې ده، خو فکر یې کاوه چې قسمت به یې ور ورسوي."
هندي پولیس وایي رضوان اشرف له ذهني اړخه جوړ خو ډېر توندلاری ښکاري.
د یادونې ده چې د "بي جي پي" ګوند د ویاندې نوپور شرما له څرګندونو وروسته په هند او یو شمېر نورو هېوادونو کې مسلمانانو لاریونونه وکړل او له ځینو اسلامي هېوادونو سره د هند دېپلوماتیکې ناندرۍ هم رامنځ ته شوې.
د عکس سرچینه، Nupur Sharma/Twitter
د نوپور شرما خلاف د هند مختلفو سیمو کې د مسلمانانو احساساتو ته د زیان اړولو د تور ګڼې دوسیې پرانیستل شوې او قضیه یې محاکمو کې روانه ده.
د نوموړې وکیل 'منندر سنګ" د سې شنبې پر ورځ محکمه کې د دغه پاکستاني سړي یادونه هم کړې.
