د عراق لومړی وزیر امریکا ته روان دی

د عراق لومړي وزیر مصطفی کاظمي داسې مهال د امریکا له ولسمشر سره د لیدو تکل کړی چې په دې وروستیو کې عراق کې پر امریکايي ځواکونو د ایران پلوه ملېشو بریدونه ډېر شوي دي.

سپینې ماڼۍ ویلي چې ښاغلی کاظمي به د جولای پر ۲۶مه له ولسمشر بایډن سره وګوري.

د سپینې ماڼۍ ویاند جن ساکي رسنیو ته ویلي ولسمشر بایډن هیله من دی چې د دواړو هېوادونو ترمنځ په سیاسي، امنیتي او اقتصادي برخو کې دوه اړخیزې همکارۍ پیاوړې او په دې لړ کې د داعش د ماتې ډاډ ترلاسه شي.

د ۲۰۲۱ کال له پیل راهیسې عراق کې د امریکا پر اهدافو ۴۷ بریدونه شوي او له دغو بریدونو په ۷ کې بې پیلوټه الوتکې کارول شوې دي.

عراق کې ۲۵۰۰ امریکايي ځواکونه مېشت دي.

په تېر یو نیم کال عراق کې د امریکا پر ګټو شاوخوا ۳۰۰ بریدونه شوي چې ډیر یې راکټي بریدونه وو.

په ورته ډول د امریکا د پوځي تجهیزاتو کاروانونه هم د سړک غاړې بمي چاودنو کې په نښه شوي.

تېره اپریل میاشت کې له چاودیدونکو توکو یوه ډکه بې پیلوټه الوتکه د ملکي الوتنو له لوري د اربیل ښار ملکي هوايي ډګر ته نږدې شوه او دغه هوايي ډګر ته څېرمه د امریکايي ځواکونو اډه کې د سي ای اې له یوه زیرمتون سره وجنګېده.

امریکا وايي دا بریدونه د ایران له ملاتړه برخمنې ملېشې کوي.

د امریکا پوځ تر دې دمه دوه ځله په ځوابي ډول عراق کې د ایران له ملاتړه د برخمنو وسله والو اهداف هم په نښه کړې دي.

د جون په شپږمه عراق کې امنیتي سرچینو وویل چې پلازمېنه بغداد کې د امریکا سفارت ته نږدې یوه بې پیلوټه الوتکه نسکوره شوې ده.

د عراق امنیتي چارواکو وویل دې الوتکې چاودیدونکو توکي لېږدول او د متحدو ایالتونو سفارت ته په نږدې وه چې د امریکا د هوايي دفاع سیستم نسکوره کړه.

د امریکا لخوا عراق کې د ایران د قدس ځواک د پخواني قوماندان قاسم سلیماني تر وژل کېدو وروسته د عراق او امریکا ترمنځ د اړیکو لوری بدل شوی.

د عراق پارلمان د ښاغلي سلیماني تر وژلو وروسته پرېکړه وکړه چې امریکايي ځواکونه دې له دغه هېواده ووځي.

د عراق ځينو حکومتي سرچینو تېره ورځ رسنیو ته وویل د امریکا ځانګړي استازي له عراقي چارواکو سره لیدنو کې له دغه هېواده کرار کرار د امریکايي ځواکونو د وتلو خبره کړې، خو لږ وروسته بیا د امریکا حکومت دا رپوټونه رد کړل.