ورځپاڼې: ټرمپ نن د افغانستان په اړه له خپلو امنیتي سلاکارانو سره غونډه لري

امریکایۍ مجلې ایکانومېسټ لیکلي چې امریکا او طالبان یوه جوړجاړي ته ډېر نږدې ښکاري. دې لړ کې نورو امریکايي رسنیو راپور ورکړی چې د امریکا ولسمشر ډونالډ ترمپ نن له خپلو امنیتي چارواکو او سلاکارانو سره له طالبانو سره د کېدونکي جوړجاړي په اړه غونډه کوي؛ هغه جوړ جاړی چې له مخې به یې امریکايي سرتیري له افغانستانه وتل پيلوي.

د رسنیو د راپورله مخې دا کتنه به په کمپ ډیوېډ کې کېږي او د بهرنیو چارو وزیر مایک پمپیو، د دفاع وزیر، د ملي امنیت سلاکار او د لوی درستیزانو د کمېټې مشر جنرال جوزېف ډانفورډ ګډون کوي.

واشنګټن پوسټ

واشنګټن پوسټ ورځپاڼې یو مطلب خپور کړی چې سرلیک یې دی، د ټاکنو او له طالبانو سره د سولې د خبرو ناڅرګندتیا افغانستان په دوو لارو کې حیران کړی.

دا ورځپاڼه د طالبانو له خوا د ټاکنو ګډوډلو ګواښ ته اشاره کوي او زیاتوي افغانان فکر کوي چې ټاکنې او یا د سولې خبرې به له ناکامۍ سره مخامخ کېږي، نو دې حالت افغانستان له یوه ناڅرګند وضعیت سره مخامخ کړی دی.خلک وايي، څه وکړي ایا ټاکنې د سولې لپاره وځنډوي؟

خو واشنګټن پوسټ لیکي:

هغه څه چې د افغانانو لپاره ډېرمهم دي هغه د افغانانو خپل منځي خبرې دي چې د واک شریکولو په اړه به په کې بحث کیږي او په دې خبرو کې ځیني لاسته راوړنې له خطر سره مخامخ دي، لکه د ښځو حقونه او ډیموکراټیک بنسټونه.

دې ورځپاڼې د هغو خلکو اندېښنو ته هم اشاره کړې چې له امریکا سره د طالبانو د ژمنو د ماتولو په اړه یې لري او وېره لري چې که طالبان د تېر په څېر واک په لاس کې واخلي نو د دوی ځاني ازادي چې اوس یې لري، له لاسه ورکړي.

نیویارک ټایمز

بلې امریکایۍ ورځپاڼې نیویارک ټایمز په افغانستان کې د ناټو ځواکونو د لوی قوماندان جنرال سکاټ مېلرهغو څرګندونو ته اشاره کړې چې ویلي یې دي، د افغان ځواکونو ملاتړ دوام لري او په دې برخه کې د دوی په ژمنتیا کې کوم بدلون نه دی راغلی.

نیویارک ټایمز زیاتوي:

د افغان ځواکونو مشرتابه اندیښنه لري که امریکا او نور متحدین یې د افغان ځواکونو ملاتړ ته دوام ورنه کړي، نو دا چاره د دوی په وړتیا ناوړه اغېز وکړي.

نیویارک ټایمز وايي، بل لورته د طالبانو په مشرتابه کې هم سیاسي ستونزې د را دبره کېدو په حال کې دي. که څه هم د دې ډلې وسله والو ته د درنو تلفات له اوښتو سره -سره تردې دمه خپلې ایډیالوژۍ ته ژمن پاتې دي، خو کله چې په حکومتي واک کې د شریکېدلو جدي خبرې پيل شي، نو ښايي دا ژمنتیا پر ځای پاتې نه شي.

واشنګټن ایګزمېنر

بلې امریکایۍ ورځپاڼې واشنګټن ایګزمېنر يوه مطلب کې لیکلي چې امریکا د ترهګرۍ له خطره د ځان ژغورلو لپاره اړتیا نه لري چې په افغانستان کې پوځيان ځای پرځای کړي؛ بلکې دا چاره د استخباراتي لارو، چټکو هوايي بریدونو، کشفي عملیاتو او له نورو هېوادونو سره د استخباراتي همکاریو له لارې کېدای شي.