ایران؛ له عراق سره د جګړې یاد خو د اسراييلي پوځیانو تصویر
د عکس سرچینه، Twitter/@mhrezaa
په ایران کې د شېراز ښار شورا مشر د څېړنو امر کړی چې معلومه کړي ولې د ایران-عراق جګړې په یاد دړه، بېلبورډ باندې د اسراییلي سرتېرو عکس لګول شوی و.
په فوټوشاپ شوي تصویر کې درې سرتېري ښکاري چې پر یوې غونډۍ ولاړ دي او ښکته ګوري. پر تصویر د شېراز ښاروالۍ نښان هم لیدل کېده او پر یوه څنډه یې د سرتېرو لپاره ستاین شعر هم لیکل شوی و.
وروسته له دې چې دغه عکس تېره اوونۍ د شېراز په مرکزي څلورلارې کې ولګول شو د خلکو پام شو چې سرتېري د اسراییلو یونیفورم لري او ام ۱۶ ډوله وسلې پر اوږه لري.
د خلکو دې ته هم پام شو چې په اصلي عکس کې د دوی ترڅنګ ولاړه ښځینه سرتېرې لېرې کړای شوې ده.
له ۱۹۷۹ کاله راپدېخوا چې ایران کې اسلامي انقلاب وشو د دغه هېواد مشرانو د اسراییلو له مینځه تللو غوښتنه کړې ده. دوی د اسراییل په نامه د هېواد شتون سره مخالف دي او د فلسطینیانو د ځمکو غاصبین یې بولي.
د هغې دړې عکسونه چې پکې د ۱۹۸۰ تر ۱۹۸۸ مو کلونو ترمنځ د ایران-عراق د یاد په موخه درول شوې وه، د چهارشنبې پر ورځ پر خواله رسنۍ خپاره شول. ایران یوه اوونۍ چې "سپېڅلې دفاع" یې نومولې د دغې جګړې یاد ته ځانګړې کړې ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
پر ټوېټر مهرضا لیکلي" ما چې کله د سپېڅلې دفاع اوونۍ کې دا لوحه ولیده اور راباندې بل شو. ام ۱۶ وسلې، بندونه یې، کالي او د سرتېرو پر سر خولۍ یې ټول د صهیونیستانو دي. که تر ټولو ښه خبره وکړم هغه به دا وي چې احمقانه کار مو کړی دی."
د اسراییلو د بهرنیو چارو وزارت پر فارسي ژبه ټوېټر پاڼې هم دې بېل بورډ ته اشاره کړې چې اوس لېرې کړای شوې ده.
سیمه ییزې رسنۍ وايي، د پنجشنبې پر ورځ د شېراز ښار د شورا مشر احمد رضا دستغیب چارواکو ته امر وکړ چې بېړنۍ څېړنه ترسره کړي.
