د فدرالي قاضي پرېکړې ته د ولسمشر ډونلډ ټرمپ جدي غبرګون

د امریکا متحدو ایالتونو ولسمشر ډونلډ ټرمپ د اوو اسلامي اکثریتي هېوادونو پر وګړو د امریکا سفر هغه بندیز بېرته فعالولو هوډ څرګند کړی، چې د دغه هېواد محکمې په موقت ډول لغو کړی.

د واشنګټن ایالت یوه فدرالي قاضي جیمز رابرټ دغه بندیز له اساسي قانون سره په ټکر کې بللی و او د محکمې له لوري یې د یوه امر له لارې په موقت ډول ځنډولی و.

امریکا ته د اوو هېوادونو پر وګړو د تګ بندیز "لیرې شو"

ټرمپ او پاکستان

د ټویټر له لارې ښاغلي ټرمپ جیمز رابرټ ' تش په نامه قاضي ' بللی او وايي ' د خندا وړ چاره ' به یې هېواد د قانون له پلي کولو لېري کړي.

له دغې پرېکړې وروسته یو شمېر هوايي شرکتونو ویلي، امریکا ته د دغو هېوادونو وګړو لېږدولو لپاره یې الوتنې پیل کړې دي.

ټرمپ حکومت وايي دغه ګام یې د امریکا خوندي ساتلو لپاره پورته کړی او وايي د اوسنۍ پرېکړې خلاف به استناف غوښتنه وکړي.

د سیاټل سیمې قاضي جیمز رابرټ د حکومتي مدافع وکیلانو د هغه دریځ خلاف پرېکړه کړې، چې ویلي یې و د ډونلډټرمپ ولسمشریز فرمان نه شي ننګول کېدای.

ولسمشر ټرمپ دا وروستیو کې هغه فرمان لاسلیک کړی، چې له مخې یې د ایران، سومالیا، عراق، سودان، لیبیا او یمن وګړو امریکايي ویزې د ۹۰ ورځو لپاره ځنډول شوي وي.

د دې تر څنګ له سوریې نه امریکا ته د کډوالو پر ورتګ د نامعلومې مودې لپاره بندیز لګول شوی و. تېره اونې په همدې تړاو د ښاغلي ټرمپ پر ضد د هېواد په لر او بر کې مظاهرې وشوې او د امریکا په یو شمېر هوايي ډګرونو کې ګډوډي رامنځته شوه.

اوس د امریکا ګمرکونو چارواکو هوايي شرکتونو ته ویلي، چې تر څو دغه قضیه په محکمه کې ده، دوی کولای شي د دغو هېوادونو وګړي امریکا ته ولېږدوي.

خو که ټرمپ حکومت وتوانیږي، له محکمې نه دې لړ کې امتناعي امر تر لاسه کړي، ښايي دغه لړۍ بېرته په ټپه ودریږي.

چارواکو د محکمې دغه پرېکړه زیاتی بللی او وايي د ولسمشر فرمان قانوني او مناسب دی.

د امریکا بهرنیو چارو وزارت د چارواکو له قوله ویل شوي، چې د ولسمشر فرمان له عملي کېدو راهیسې نژدې ۶۰ زره ویزې ځنډول شوې دي.

د ټرمپ له لوري د بندیز له لګول کېدو وروسته محکمې ته د واشنګټن ایالت له لوري عریضه وړاندې شوه، چې وروسته مینسوټا ایالت هم په کې شامل شو.

د واشنګټن لوی څارنوال باب فرګوسن دغه بندیز غیر قانوني او له اساسي قانون سره ټکر کې بللی، ځکه د نوموړي په خبره دغه بندیز د خلکو منځ کې د هغوی د مذهب پر بنسټ تبعیض رامنځته کوي.

واشنګټن کې د بي بي سي خبریال ډېوېډ ویلیس وايي، د فدرالي قاضي دغه پرېکړه د ټرمپ حکومت لپاره یوه جدي ننګونه بلل کېږي، چې د اوو مسلمان اکثریتي هېوادونو وګړي، چې بندیز پرې لګېدلی و اوس کولای شي د امریکا ویزا لپاره غوښتنلیکونه وړاندې کړي.

خو حکومت د دغې پرېکړې خلاف استناف غوښتنه کولای شي.