امریکا د ګوانتانامو څلور بندیان سعودي ته لېږدوي
د عکس سرچینه، US DEPARTMENT OF DEFENCE
امریکايي چاراوکو ویلي، د امریکا متحده ایالتونه له ګوانتانامو زندان نه څلور بندیان سعودي عربستان ته لېږدوي.
چارواکو ویلي، ولسمشر بارک اوباما هڅه کوي د بندیانو د لېږد د مخنیوي په موخه د نوي منتخب ولسمشر ډونلډ ټرمپ پر فشار سربېره ګوانتانامو زندان کې د بندیانو شمېر کم کړي.
څارونکي وايي، دا د روانې جنورۍ پر ۲۰مه د ولسمشر په توګه د ټرمپ له لوړې کولو وړاندې لومړی ځل دی چې اوباما د ایټالیا، عمان او عربي متحده اماراتو په ګډون څلورو هېوادونو ته نژدې ۱۹ بندیان لېږدوي.
که د پلان له مخې بندیان ولېږدول شي، نو ګوانتانامو زندان کې به ایله ۴۰ بندیان پاتې شي.
بارک اوباما د ۲۰۰۹ کال ټاکنو کې ژمنه کړې وه چې د کیوبا په ټاپو کې به د ګوانتانامو دغه لانجمن زندان وتړي.
ټرمپ بیا ویلي وو، چې دا زندان به پرانیستی وي او ځینې ''خطرناک خلک'' به پکې بندي وساتل شي.
رویټرز خبري اژانس وړاندې د اوباما د ادارې له خولې ویلي وو، چې اوباما د نورو بندیانو د لېږدولو هوډ لري.
د ټرمپ نیوکه
د سې شنبې په ورځ ټرمپ پر ټویټر لیکلي وو ''له ګوانتانامو نه باید نور کسان خوشي نه کړل شي... دغه کسان ډېر خطرناک دي چې د جګړې ډګر ته یې د ستنېدو لار باید ونیوله شي''.
د عکس سرچینه، AFP
سپینې ماڼۍ د ټرمپ د دې نیوکې په اړه کوم غبرګون ونه ښود.
سعودي عربستان ته د لېږدېدونکو بندیانو د هویت په اړه نور معلومات نه دي ورکړل شوي.
سعودي عربستان په تېره اپریل میاشت کې د نهو یمني بندیانو د منلو موافقه وکړه.
د ګوانتانامو له ۵۹ بندیانو نه یې ۱۰ د سپتمبر د ۱۱ بریدونو کې د لاس لرلو په تور د پوځي جرګه ګیو او محاکمو په انتظار دي.
په ۲۰۰۹ کال هغه مهال چې اوباما ولسمشر کېده، ګوانتانامو زندان کې ۲۴۲ بندیان وو.
خو ګانګرس کې د جمهوریپالو مخالفت د زندان په تړلو کې د اوباما د هڅو لاره ډب کړه، همدا وو چې امریکا ته یې د بندیانو د لېږد مخه هم ونیول شوه.
