پاکستان سوپرليګ: پېښور زلمو په شپږو وېکټو له کوټې لوبه وګټله
د عکس سرچینه، PCB
د پاکستان کرېکټ سوپر ليګ سياليو څلورمه لوبه د پېښور زلمي او کوټې ګلډيېټرز تر منځ د کراچۍ په لوبغالي کې وشوه چې پېښور زلمي په شپږو وېکټو وګټله.
پېښور زلمي لوبډلې د پچې له ګټلوسره مقابلې لوبډلې ته د توپ وهنې بلنه ورکړه. کوټې ګلډي ايټرز په ټاکلو شلو اورونو کې د پنځو لوبغاړو په سوځېدو سره پېښور ته د ۱۴۹ منډو هدف وټاکه چې پېښور وکولی شوی په ۱۹ اور کې يوازې د څلورو لوبغاړو په سوځېدو سره بشپړ کړي.
د کوټې لپاره جېسن روی په ۵۷ توپونو ۷۳ او سرفراز احمد په ۲۵ توپونو ۴۱ منډې وکړې خو له دوی پرته نورو لوبغاړو ونشوی کولی چې ډېرې منډې وکړې.
د پېښور لوبډلې لپاره وهاب رياض دوې، راحت علي، محمد عامر خان او ډرن سمي يوه يوه وېکټه واخيسته.
د توپ وهنې په برخه کې د پېښور لوبډلې لپاره کامران اکمل ښه وځېلد، ده په ۵۵ توپونو سليزه ووهله او په ټولو ۱۰۱ منډو د فواد احمد پر توپ وسوځېد. د ده تر څنګ حيدر علي ۲۵ منډې وکړې.
د پاکستان کرېکټ سوپر لیګ کې شپږ لوبډلې لوبېږي چې په کې د پېښور زلمي، اسلام آباد یونائټېد، کوټه ګلډي ایټرز، ملتان سلطان، کراچي کېنګز او لاهور قلندرز په نامه لوبډلې شاملې دي.
د عکس سرچینه، TWITTER/PCB
د پېښور زلمي لوبډلمشر ډرېن سمي ته افتخاري تابعيت
د پاکستان کرېکټ بورډ پر يوېټر پاڼه راغلي چې د پاکستان ولسمشر عارف علوي پرېکړه کړې چې د وېسټ انډيز پخواني کپتان ډرېن سمي چې اوس د پېښور زلمي لوبډلمشر دی، د پاکستان افتخاري تابعيت او عالي ملکي مډال ورکړي.
ازاد خبريال عرفان خټک د پاکستان کرېکټ بورډ له خولې وايي، ډرېن سمي ته د مډال او افتخاري تابعيت پرېکړه د پاکستان کرېکټ ته د نوموړي خدمت او دغه هېواد ته د نړيوال کرېکټ بېرته راګرځولو هڅو له امله شوې ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د پېښور زلمي څښتن جاويد اپريدي پر خپله يوېټر پاڼه ليکلي چې "د پاکستان کرېکټ په تاريخ کې دا وياړ د پېښور زلمي لوبډلې په برخه دی چې لوبډلمشر ته یې د پاکستان له خوا عالي مډال ورکول کېږي".
