محمد قاضي زاده له هرات څخه

	په هرات کې افغان چارواکي وايي ايستل شوي ١٦٠ کډوال ټول سړي دي

دا کار په داسې حال کې شوى چې د افغانستان د بهرنيو چارو وزارت تيره اوونۍ يو وار بيا له تهرانه وغوښتل چې د ژمې په مياشتو کې دې افغانان له خپلې خاورې نه وباسي .

په هرات کې د کډوالو د چارو مسوول شمس الدين حامد بي بي سي ته وويل که چيرې چارواکو د دۀ په وينا پر وخت گام نه واى اخيستى د دغو ايستلو شويو کډوالو ژوند ښايي له خطر سره مخامخ واى .

ښاغلي حامد زياته کړه چې دې کسانو قانوني اسناد نه لرل خو په هرات کې واورو او سختې يخنۍ ته په پام سره بايد دغه کډول اوس نه واى ايستل شوي .

دغه چارواکي د افغانستان د بهرنيو چارو د وزارت د تيرې اوونۍ غوښتنه يو وار بيا تکرار کړه او له ايراني چارواکو يې وغوښتل چې د ژمې په سختو شرايطو کې دې کډوال نه وباسي .

په تيرو څو ورځو کې د افغانستان ډيرې برخې په واورو پوښلې دي او سختو يخنيو د هيواد په بيلا بيلو برخو کې يو شمير کسان وژلي دي .

ځينو نا تاييد شويو رپوټونو ښووله چې د هرات په ځينو برخو کې تر نيم متره ډيره واوره شوې ده .

ايرن تيره اوونۍ ويلي و چې شاوخوا يو نيم ميليون افغان کډوال د دوى په خاوره کې بې له قانوني اسنادو ژوند کوي .

د ايران د کورنيو چارو د وزارت چارواکو گواښ کړى و چې له دې هيسته به ناقانونه افغانان نيول کيږي او په هغو کمپونو کې به تر پنځو کلونو پاتې کيږي چې د دوى په وينا يې شرايط زندان ته ورته دي .

د هغو گواښونو په ځواب کې د افغانستان د بهرنيو چارو وزارت وويل چې دوى په کابل کې د ايران له سفارت سره په دې باب خبرې کړي دي .

افغانستان به راتلونکې اوونۍ د يوۀ وزير په مشرتابۀ ايران ته پلاوى ليږي چې د کډوالو پر مسالې له تهران سره خبرې وکړي .