له دوى څخه ١٦ سرتېري نژدې يوه مياشت مخکې تښتول شوي وو او درې نور سرتېري له يوۀ ملکي چارواکي سره يوځاى تېره اونۍ برمته شول

له دوى څخه ١٦ سرتېري نژدې يوه مياشت مخکې تښتول شوي وو او درې نور سرتېري له يوۀ ملکي چارواکي سره يوځاى تېره اونۍ برمته شول. له لومړۍ ډلې څخه يو سرتېرى وژل شوى دى.

وروسته له هغه چې تېره مياشت د سيمه ييزو قبايلي مشرانو او حکومت تر منځ د سولې لس مياشتنى تړون مات شو، تاوتريخوالى په سيمه کې مخ په زياتېدو دى.

لږ تر لږه ٦٠ پاکستاني سرتېري او ٢٥٠ اورپکي په تېره يوه مياشت کې وژل شوي دي.

اتلس سرتېري وروسته له هغه خوشي شول چې د يوې سيمه ييزې قبايلي شورا غړي له وسله والو سره نن (سه شنبه) وختي جوړجاړې ته سره ورسېدل.

د پاکستان د پوځ وياند وحيد ارشد بي بي سي ته وويل: ''هو، يرغمل شوي کسان خوشي شوي او قبايلي مشرانو ته سپارل شوي دي.''

دۀ وويل سرتېري يې بې له کوم قيد او شرطه خوشي شوي او د هغو په بدل کې يې د اورپکو زندانيانو د پرېښودلو خبره رد کړه.

خو، ځينو سرچينو بي بي سي ته ويلي چې د اورپکو يو شمېر غړي به په پټه خوشي کړل شي.

د دوشنبې په ورځ اورپکو يوه داسې ويديويي پټه خپره کړه چې پکې د يوۀ سرتېري د سر پرېکول ښيي.

له کله چې حکومت تېره مياشت په اسلام اباد کې له سرۀ جومات څخه طالبان وايستل او ١٠٠ تنه يې پکې وژل، په قبايلي سيمه کې پر حکومتي ځواکونو بريدونه زيات شوي دي.