د جومات او دوو مدرسو زده کوونکي په وسلو سمبال دي

په وژل شويو کې يو سرتېرى، دوه پوليس او دوه زده کوونکي دي.

د لال جومات بهر له څو ساعته جگړې وروسته ښکېلو غاړو پر اوربند خبرې پيل کړې.

په جومات او په ورسره تړليو دوو مدرسو کې وسله والو زده کوونکو د اسلامي شريعت د پلي کولو لپاره هلې ځلې پيل کړې او په دې توگه يې د حکومت په ضد پر بغاوت لاس پورې کړى.

لال جومات او ورسره د هلکانو او نجونو دوه مدرسې په وروستيو کې د په ځينو لويو لانجمنو پېښو کې ښکېلې پاتې شوې. زده کوونکو د فحشا په تور څو مرکزونه تړلي او د دوى په گمان په دغې چارې کې ښکېلې ښځې او پوليس يې بنديان کړي دي.

له جوماته بهر د بي بي سي خبريال وايي د اوربند خبرې د متحده مجلس عمل په نامۀ د اسلامي گوندونو د ايتلاف يوۀ سياستوال په نوښت پيل شوې.

په اسلام اباد کې پوليس او ډاکتران وايي د پوځ يو سرتېرى، دوه پوليسان، دوه زده کوونکي، يو لاروى او يوه عکاس په نښته کې وژل شوي.

نور راپورونه د تلفاتو شمېره تر لس پورته ښيي.

کله چې جگړه توده شوه، عادي پوليسو او حکومتي مليشو چې جومات يې محاصره کړى و خپل ځاى ځانگړو پوځونو ته پرېښود.

	د جگړې له پيل سره د ښځينه مدرسې زده کوونکو د سيمې پرېښودل پيل کړل

امبولانسونو او خبريالانو ته وويل شول چې له سيمې څخه گوښې ته ولاړ شي.

د جومات شاوخوا د زده کوونکو لويو ډلو چې ډېرو يې له ځان سره کوتکونه او پيترولي بمونه لېږدول گزمه کوله.

د نن ورځې مرگ ژوبله د پاکستاني حکومت او د مدرسې د چلوونکو تر منځ له څو مياشتې ښکر په ښکر کېدو وروسته رامنځته شوه.

مخکې ولسمشر جنرال پروېز مشرف ويلي و چې ځواکونه يې ځکه پر جومات پوځي عمليات نه شي ترسره کولى چې وېره ده زده کوونکي به په ځواب کې ځانمرگي بريدونه وکړي.

د بي بي سي خبريالان وايي داسې باور دى چې د جومات ملايان په امنيتي ځواکونو کې پياوړي ملگري لري چې دومره وخت يې د پوځي گام د اخيستلو په مخنيوي کې مرسته کړې.

خو، نننۍ نښته ښيي چې حکومت اخر اړ شوى چې د جومات په ضد په پوځي توگه لاس په کار شي.