عبد الرشيد غازي لوړه کړې وه چې تر وروستۍ سلگۍ پورې به جنگېږي

د پاکستان د کورنيو چارو وزارت وايي د ښاغلي غازي مړى څو ساعته وروسته له هغه د جومات په زېرخانه کې وموندل شو چې پوځ پر چپاو لاس يورې کړ.

مخکې د پاکستان د پوځ يوۀ وياند، وحيد ارشد، وويل چې د سرۀ جومات په نښتو کې ٥٠ زده کوونکي او اته سرتېري وژل شوي او ٥٠ ښځې او ماشومان ژغورل شوي دي.

د پاکستان پوځ له تېرې اونۍ راهيسې د اسلام اباد په زړه کې دغه جومات محاصره کړى.

تېره شپه د وروستي ځل لپاره د خبرو اترو له ناکامېدو وروسته، پاکستاني پوځ پر جومات باندې يرغل پيل کړ. دوى له ياغي طالبانو څخه د جومات گوټ - گوټ پاکولو عمليات پيل کړل.

ويل کېږي ښاغلي غازي او نورو پاتې زده کوونکو د چپاو له پيل وروسته د جومات په زېرخانه کې ځانونه خوندي کړي وو.

حتمي  ''دا يو بربنډ تېرى دى. اوس زما شهادت حتمي دى عبد الرشيد غازي

چارواکي وايي دغه ملا هغه مهال ووژل شو چې د تسليمېدلو هڅه يې وکړه. تر اوسه ښکاره نه ده چې د چا په ډزو کې به د جومات مشر وژل شوى وي.

دى په اصل کې د سرۀ جومات دويم مسوول و. د سر سړى، ملا عبد العزيز غازي، له وړاندې د پوځ لخوا د ښځو په چادري کې د وتلو پرمهال نيول شوى و.

عبد الرشيد غازي له خپل مرگ څو ساعته مخکې يوۀ خصوصي پاکستاني تلوېزيون ته ويلي و چې پوځ پر دوى باندې بربڼد تېرى پيل کړى.

هغه ويلي و: ''دا يو بربنډ تېرى دى. اوس زما شهادت حتمي دى. ''

سور جومات او ورسره تړلې دوه مدرسې، يوه د هلکانو او بله د نجونو، وروسته له هغه پاکستاني حکومت ته پر لانجې واوښت چې زده کوونکو يې په اسلام اباد کې د شريعت د پلي کولو هلې ځلې پيل کړې.

پوره يوه اونۍ مخکې پوځيانو سور جومات محاصره کړ. دا وروسته له هغه چې په څو پېښو کې د دغه جومات او د ورسره تړليو مدرسو زده کوونکو د بدلمنۍ په تور څو چينايي کار کوونکي وتښتول.