رحمان الله په پېښور کې

	دا په دوو ورځو کې پر پاکستاني سرتېرو د هېواد په شمال لوېديځ کې دويم مرگونى بريد دى

دا بريدونه وروسته له هغه کېږي چې تېره اونۍ د اسلام اباد د سره جومات په نښتو کې ١٠٢ کسان ووژل شول، چې ډېرى يې اورپکي زده کوونکي ول.

چارواکي وايي په نننۍ (د يکشنبې) پېښه کې لومړى دوو ځانمرگيانو خپل گاډي له يوۀ پوځي کاروان سره وجنگول او بيا پر سړک له مخکې ځاى پرځاى شوي بمونه وچاودېدل.

د پوځ وياند ډگر جنرال وحيد ارشد بي بي سي ته وويل په مټه سيمه کې دغه بريد د دوى يوولس سرتېري وژلي او ٤٠ نور يې ټپيان کړي دي.

تېره ورځ په شمالي وزيرستان کې يوۀ ځانمرگي بريد٢٤ سرتېري ووژل.

د بريد سيمه د طالب پلوو اورپکو مرکز گڼل کېږي. درې ورځ وړاندې هم د سوات په سيمه کې پر امنيتي ځواکونو ځانمرگى بريد شوى و چې پنځه تنه پکې مړه شول.

داسې وېره ده چې دا وروستي بريدونه به اسلام اباد د سرۀ جومات له نښتو سره تړلې وي. د جومات په ١٠٢ تنو وژل شويو کې ١١ سرتېري ښوول کېږي، خو دا نه ده ښکاره چې په پاتې مړو کسانو کې څومره وسله وال زده کوونکي دي او څومره نور خلک.

حکومت د هېواد شمال لوېديځو سيمو ته په زرگونو سرتېري لېږلي چې د جومات له کشالې وروسته احتمالي پيلېدونکې سپېڅلې جگړې مقابله وکړي.

په دغه جومات کې ډېرى زده کوونکي د پاکستان له شمال لوېديځو قبايلي سيمو څخه وو. هغه مهال چې جومات د پوځ تر سختې محاصرې لاندې و، د جومات مسولينو گواښ کړى و چې په ټول پاکستان کې به د حکومت په ضد بريدونه پيل کړي.

له مخکې لا وېره وه چې سور جومات په قبايلي سيمو کې چې له وړاندې لا نارامه وزيات شمېر خواخوږي لري.