نيک چايلډ له لندن څخه

	د سرۀ جومات په پېښه کې گڼ کسان ووژل شول او پر مشرف يې فشارونه ډير کړل

په ٢٠٠١ کال کې پر متحدو ايالاتو باندې تر بريدونو وروسته واشنگټن او ملاتړو يې د پاکستان پر مشر جنرال پرويز مشرف او هغه بيا د دوى پر ملگرتيا ډير باور وکړ .

خو دغه ايتلاف ټول وخت اسانه نه و اوس بيا په ځانگړې توگه ډير ناسم ښکاري . د سرۀ جومات کلابندي ، ورپسې خونړيو ځانمرگو بريدونو او د سترې محکمې د قاضي القضات بيا پر ځاى کيدو پر جنرال مشرف پر کور دننه فشارونه ډير کړل .

د متحدو ايالاتو د مامورينو له خوا دې څرگندونو چې که دوى په پاکستان کې د القاعدې له لاسه ژر تلونکي هدفونه وموندل نو واشنگټن پرې د بريد کولو حق لري ، د اسلام اباد قهر وړى غبرگون وپارواوۀ .

خو په واشنگټن کې هم زړۀ تنگي شته ، پاکستان ته په سفر د ورتلونکو لويديځو مامورينو پرله پسې دغه پيغام دى چې مشرف بايد په قبايلي سيمو کې د اورپکو کابو کولو ته ډير څه وکړي ، داسې گومان کيږي چې دغه اورپکي په گاونډي افغانستان کې ثبات ته گواښ پېښوي .

امريکاييان له هغۀ تړونه هم خوښ نه ول چې مشرف له قبايلي مشرانو سره کړى و هغه تړون هسې هم ختم شو .

د متحدو ايالاتو د استخباراتو وروستۍ شنننې دا دي چې القاعدې د پاکستان په ليرې پرتو سرحدي سيمو کې ځان بيا سره ټول کړى دى . د ځينو لويديځو شننونکو لپاره اوس د امنيت په برخه کې تر افغانستان هم پاکستان بيړنۍ مساله ده .

خو بيا هم ډير امريکايي مامورين په دې باور دي چې د دوى لپاره مشرف تر ټولو ښه ملگرى دى ، ځينې په دې باور دي چې پر مشرف باندې نوي فشارونه او دا احساس چې وخت يې له گوتو تلونکى دى ښايي دى د هغو پريکړو عملي کولو ته اړ باسي چې لويديځ پرې ټينگار کوي .