د بي بي سي د نړيوالې څانگې خبريال له اسلام اباد څخه

	د وزيرستان په قبايلي سيمه کې طالب پلوى مشر حاجي عمر وايي اغزن تار د بريدونو مخه نه ده نيولې

د پاکستان په قبايلي سيمه کې طالب پلوي اورپکي د پولې بلې غاړې ته په افغانستان کې په بريدونو کې په ډېرېدونکې توگه ښکيل دي.

د طالبانو قومندان حاجى محمد عمر په زغرده وايي چې طالبانو په افغانستان کې پر نړيوالو ځواکونو بريدونو ډير کړي دي.

نوموړي چې افغانستان ته نژدې د پاکستان له يوې ليرې قبايلي سيمې څخه له بي بي سي سره خبرې کولې دا ومنله چې پر پولې پلې گزمه ډيره شوې ده.

د پاکستان حکومت پر پولې د اغزن اوږد د يوال په جوړولو پيل کړى خو حاجي عمر وايي چې دغه خنډ پر نړيوالو ځواکونو د بريدنو په موخه افغانستان ته د اروپکو د اوښتنۍ مخه نه ده نيولې.

نوموړي زياته کړه چې دا مهال د پاکستاني اورپکو ونډه د امريکا پر ضد جگړې لپاره چې هغه يې جهاد بولي له بل هر وخت ډيره ده.

د حاجي عمر دا ادعا د پاکستان حکومت هغه ټينگار ردوي چې څو ځلې يې نړيوالې ټولنې ته پر پولې د بريدونو د کميدو خبره کړې وه.

د حاجى عمر د څرگندونو له مخې طالبان هر ورځ شاوخوا ٦٠ بريدونه کوي.

نوموړى وايي چې ډيرى دغه بريدونه د پاکستان له قبايلي سيمو تر سره کيږي.