اورپکي وايي په سرحدي سيمو کې بې له ويرې گرځيداى شي

متحده ايالتونه او ناټو وايي په افغانستان کې د طالبانو د پسرلنيو بريدونو د مخنيوي لپاره د پاکستان مرسته خورا اړينه ده.

طالب جنگيالي د پاکستان په سرحدي سيمو کې پناه اخلي خو اسلام آباد دا نيوکې په کلکه رد کړي چې د هغو د مخنيوي لپاره پوره هلې ځلې نه کوي.

رابرت گېټس وويل پر دې يې خبرې کړي چې څنگه پاکستان کولاى شي په افغانستان کې د متحده ايالتو له قوماندانانو سره کار وکړي چې د پولې دواړو غاړو ته پر اورپکو زور واچوي.

هغه وويل متحدين دا موقع لري چې طالبانو ته يوه ستراتيژيکه ماته ورکړي

ښاغلي گېټس پاکستان يو ډېر پياوړى ملگرى وباله.

نوموړي هغه نيوکې غبرگې نه کړې چې د متحده ايالتو او ناټو ځېنې نور چارواکي يې لري چې اسلام آباد هغو طالبانو ته څه نه وايي چې پر خاوره يې پناه اخلي.

ولسمشر مشرف دا منلې چې د پولې د څارلو په برخه کې کمزوري ټکي شته او دا چې طالبان په پاکستان کې دننه ملاتړ تر لاسه کوي.

خو نوموړى دا خبره په کلکه ردوي چې کوم دولتي چارواکى دې د طالبانو ملاتړ وکړي او دا يې هم نه دي منلي چې د دوه نيم زره کيلومتره اوږدې پولې ټول مسوليت دې يوازې د پاکستان پر غاړه وي.

ښاغلي مشرف ويلي د پولې امنيت بايد يوه گډه هڅه و اوسي چې دواړه غاړو ته يې ځواکونه تر سره کړي.