پاکستان وايي دوى د القاعدې تر ټولو ډير غړي نيولي دي .

په اسلام اباد کې د برتانيا سفير رابرت برينکلي وويل (( دا د برتانيا لپارهخورا ډيره د لندېښنې خبره ده )) خو ښاغلي برينکلي پاکستان په هغه څه وستايۀ چې دۀ په دې لاره کې د مرستې لپاره هلې ځلې وبللې .

په برتانيا کې گڼ شمير پاکستاني کډوال ميشت دي چې ډيره برخه يې له پاکستان سره اړيکي پالي .

يو شمير ځوان پاکستاني الاصله برتانويان په دې تورن شوي دي چې په برتانيا کې يې د وژونکو بريدونو نيت لارۀ .

د برتانياد استخباراتو څانگه وايي د هغو کسانو ډيريو په پاکستان کې د القاعدې له مشرتابۀ سره اړيکي لرلې چې د ٢٠٠٥ کال په جولاى کې يې په لندن کې چاودنې وکړې .

د چارشنبې په ورځ د متحدو ايالاتو د دفاع وزير رابرټ گېټس د کانگرس يوۀ پلاوي ته په واشنگټن کې وويل چې القاعدې د پاکستان په قبايلي سيمو کې روزنيز کمپونه جوړ کړي دي او د نړۍ په نورو سيمو کې يې له (( ترهگرو شبکو )) سره اړيکي ټينگي کړې دي .

د پنجشنبې په ورځ په پېښور کې د خبرو پر مهال ښاغلي برينکلي وويل په برتانيا کې دا اندېښنه شته چې هلته پټ ترهگر په پاکستان کې د القاعدې له مشرتابۀ سره اړيکي لري .

له همدې ځايه هغوى لارښونه ترلاسه کوي ، نظرونه اوري او په ځينو مواردو کې د عملياتو لپاره روزنه ويني .