جيمز ويسټهيډ له واشنگټن څخه

	د چان نيگروپونتې دغه خبرې داسې ښکاري چې په لومړي ځل دې امريکا پاکستان ته د القاعدې د مرکز په سترگه کتلي وي

تر اوسه پورې امريکا په دومره دقيق او ښکاره ډول نه و ويلي چې د القاعدې مشران دې چيرې پټ شوي وي .

د نړيوالې ترهگرۍ د گواښ په باب مشرانو جرگې ته د خبرو پر وخت د امريکا د استخباراتو مشر جان نيگروپونتې وويل چې د الاقاعدې مرکزونه اوس په پاکستان کې دي .

د ملي استخباراتو د مشر له خوا دغه بيان چې د معمول خلاف ډير واضح دى، ظاهرآ لومړى ځل دى چې امريکا په ښکاره پاکستان په گوته کوي چې د القاعدې د مشرتابۀ د قوماندې اوسنى کور دى . پاکستان د نړيوالې ترهگرۍ پر ضد د امريکا مهم ملاتړى دى .

د متحدو ايالاتو د مشرانو جرگې د استخباراتو کمېټې ته د وينا پر وخت جان نيگروپونتې القاعده هغه ترهگر سازمان وبالۀ چې متحدو ايالاتو ته تر ټولو ستر گواښ پېښوي .

دۀ وويل القاعدې د خپلو نړيوالو اړيکو په مټ چې له خپل مشرتابۀ څخه يې د پاکستان له خوندي ځايونو ترلاسه کوي ورځ په ورځ غښتلې کيږي .

خو دۀ اسامه بن لادن په نامۀ ياد نه کړ او نه يې هم دا وويل چې د پاکستان په کوم ځاى کې به پټ وي .

متحدو ايالاتو له ډيره وخته په پاکستان کې د اسلام پالو اورپکو له فعاليته شکايت لارۀ خو دغه ډول ښکاره دعوه به د پاکستان ولسمشر پرويز مشرف ته شرمونکې وي چې ښاغلى نيگروپونتې يې د ترهگرۍ پر ضد جگړه کې د امريکا مهم ملگرى گڼي .