حنان حبىبزى له کابله

	د عامو افغانانو ترمنځ روان امنيتي حالت په نژدې راتلونکي کې د ټيکاو د رامنځته کېدو هيلې له منځه وړي دي .

د کابل د پوليسو د جنايي مبارزې مسول جنرال عليشا پکتياوال بي بي سي ته وويل چې په وژل شو کسانو کې يو امريکايي او بل يې د نيپال وگړى دى .

خو د کورنيو چارو وزارت وياند وويل ، په وژل شو کې يو امريکايي او يو تن ملکي افغان دى .

ښاغلي پکتياوال وويل : (( يو ځانمرگي بريد کونکي پخپل کورولا ډولي گاډي کې چاودونکي توکي ځاى په ځاى کړي وو .

د امريکايي ځواکونو يو کاروان ته څيرمه يې خپل گاډى والوزاوو .دغه کاروان له سيمې څخه تيريده .))

عليشا پکتيا وال وويل په دې بريد کې د بهرنيو ځواکونو دوه گاډي هم ويجاړ شوي دي .

پوليس وايي چې ددغو امريکايي سرتيرو د سپرلۍ گاډي د مرمۍ ضد نه وو .

ددغه بريد پړه طالبانو په غاړه اخيستې ده

د پوليسو په وينا بريد د کابل په ختيځ کې د څرخي پله زندان ته څيرمه ترسره شوى دى .

ددغه زندان د بيا رغاوني چارې د امريکايي پوځيانو له خوا روانې دي چې د گونټانامو له زندان څخه دبنديانو د راليږدولو جوگه شي .

خود ناټو ځواکونو سم لاسي د بريد په اړه جزيات نه دي ورکړي .

په افغانستان کې د ناټو په مشرۍ د نړيوالو سوله ساتو سرتيرو يو وياند له بي بي سي سره په خبرو کې د بريد پخلى وکړ خو د کېدونې مرگ ژوبلې په اړه يې جزيات ورنکړل .

په دوه اونيو کې دا دوم ځل دى چې په کابل کې بمي بريدونه افغان او نړيوالو ځواکونو ته مرگ ژوبله اړوي .

له دې وړاندې د کابل د پوليسو د اکاډمۍ د ښونکو د عملې پر بس بمي بريد ٢٤ تنه ووژل او د ملکي خلکو په گډون يې له ٥٠ څخه ډير نور ټپيان کړل .

له بلې خوا د پاکستان او ايران له پولو سره څيرمه د افغانستان سوېلي سيمې د پلې او غلچکۍ جگړې ډگر دى .

په دې سيمو کې نړيوال او افغان ځواکونه د وسله والو طالبانو له بريدونو سره مخامخ دي چې د ملکي خلکو سره بيره دواړو غاړو ته مرگ ژوبله اړوي .

له دې حالاتو څخه په جوت ډول ښکاري چې وسله وال زورزياتى لا پسې توديږي .

دې حالت پر نړيوالې ټولنې چې د امنيت د ټينگښت دنده په غاړه لري فشار ډير کړى دى .

او د عامو افغانانو ترمنځ روان امنيتي حالت په نژدې وخت کې د ټيکاو د رامنځته کېدو هيلې له منځه وړي دي .