د مارچ په ٢٨ نېټه هم د کابل په ښار کې ځانمرگى بريد شوى و چې مرگ ژوبله ورسره مله وه

دغه پېښه د کابل ښار په سويل کې د دارالامان په سيمه کې وشوه . دغلته د افغانستان د ملي شورا ودانۍ هم ده .

د کابل د پوليسو مشر وايي په دغه پېښه کې ځاى پر ځاى د بريد کوونکي په گډون څلور کسان ووژل شول .

په پېښه کې پنځه کسه ټپيان و چې د ابن سينا د روغتون د چارواکو په وينا له ټپيانو څخه هم يوۀ تن ساه ورکړه .

په وژل شويو کسانو کې يوازې يو کس پوليس ښوول شوى دى . د چاودنې په سيمه کې نړيوال ځواکونه نه و .

د افغانستان په پلازمنه کابل کې دا د ٢٠٠٧ کال راهيسته دريم ځانمرگى بريد دى .

وروستى هغه د مارچ په ٢٨ نېټه شوى و چې دوه تنه يې ووژل او پنځه کسه نور يې ژوبل کړل.

په تيرو درو مياشتو کې په ټول افغانستان کې څه کم ٣٠ ځانمرگي بريدونه شوي دي.

افغان او ناټو ځواکونو وار دمخه اټکل کړى و چې سږ کال به د وسله والو طالبانو له خوا ځانمرگي بريدونه ډيريږي .

د دوى دليل دا و چې گواکې وسله وال طالبان نور کمزوري شوي او د بريد يوازينۍ لاره ورته د ځانمرگو بريدونو پاتې شوې ده .