ميرويس افغان له کندهاره

	بريدونه د ميرويس نيکه زيارت ته نژدې د کندهار هرات پر لويه لاره شوي دي

دغه بريدونه چې له يوۀ بله د ٢٠ دقيقو په واټڼ کې وشول دواړه د کندهار هرات پر لويه لاره شوي دي .پر دغې لويې لارې د موټرو او خلکو خورا ډيره گڼه گوڼه وي .

دغلته گڼ شمير تيل پلورونکې هټۍ شته چې د عيني شاهدانو په وينا اور ورته شوى دى .

افغان چارواکي وايي په دغو چاودونو کې بريد کوونکي وژل شوي او پنځه ملکي کسان پکې ټپيان دي چې دوه يې ماشومان دي .

بريد کوونکي په موټرو کې سپارۀ و . ظاهرآ يې هدف د ناټو کاروانونه و چې په لاره تيريدل .

قاري يوسف چې ځان د وسله والو طالبانو وياند بولي بي بي سي ته له يوۀ نامعلومه ځايه د تيلې فون په کرښه وويل چې بريد دوى کړى دى .

قاري يوسف وويل چې په بريد کوونکو کې د دۀ په وينا يو کس افغان و خو د بل يوۀ په باب يې معلومات نه لري .

لومړني رپوټو نه ښيي چې لږ تر لږه د ناټو يوۀ گاډي ته په دغو بريدونو کې تاوان اوښتى دى خو کوم سرتيرى يې نه دى ټپي شوى .

د ٢٠٠٧ کال له پيل راهيسته په ټول افغانستان کې له دغو ځانمرگو بريدونو سره ټول ١٨ بريدونه شوي دي .

په دغو ځانمرگو بريدونو کې ډير تاوان ملکي کسانو ته ور اوښتى دى چې تر ټولو لوى يې د کابل په شمال کې د بگرام هوايي ډگر ته نژدې و . په هغه بريد کې د افغان چارواکو په وينا ٢٣ کسان وژل شوي و .