الياس وحدت له خوست څخه

	په دې وروستيو کې د خوست ولايت څو ځلي د چاودنو او نورو بريدونو ښکار شوى دى

د خوست ولايت والي ارسلا جمال او د پي ار ټي يا ولايتي بيا رغاونې چارواکي دغلته د يوې نوې ودانۍ د پرانيستنې لپاره ټول شوي و .

د عيني شاهدانو په وينا بريد کوونکي د ډاکټرانو سپينه چپنه اغوستې وه . پر دۀ شک شوى دى او د ناټو ځواکونو پرې ډزې کړي دي .

له ډزو سره جوخت ځانمرگي ځان وچووه چې د خوست د والي ارسلا جمال په وينا پکې د ناټو دوه سرتيري او د روغتون يو افغان کارکوونکى ټپيان شوي دي .

د خوست والي بي بي سي ته وويل چې دۀ يو تنکى زلمى چې شايد د ١٦ يا ١٧ کلونو په عمر و وليد چې د ډاکټرانو سپينه چپنه يې اغوستې وه او غوښتل يې چې د دۀ په لور ورنژدې شي .

د ناټو سرتيرو دغه زلمى ودراۀ خو دۀ يې ټوپک ته لاس واچاوۀ او د سرتيرو له خوا پر مځکه راوپرځول شو .

لږ شېبه وروسته چاودنه وشوه چې بريد کوونکى پکې ځاى پر ځاى ووژل شو .

په کابل کې د ناټو ويندويان يوازې دومره مني چې په خوست کې چاودنه شوې ده خو د نورو جزيياتو په باب وايي چې پلټنه يې روانه ده .

دوى دا هم نه وايي چې ټپي شوي سرتيري د کوم هيواد اوسيدونکي دي . په خوست کې د پي ار ټي ډله د متحدو ايالاتو له سرتيرو جوړه ده .

عيني شاهدان وايي ظاهرآ نوره مرگ ژوبله نه ده شوې البته نوې ودانې شوې ودانۍ ته يو څه تاوان اوښتى دى .

د ځاني تاوان د کمېدو يو دليل دا ښوول شوى چې دستوره په ختميدو وه او ځينې خلک تللي و .

بل پلو د کونړ ولايت په ناړۍ ولسوالۍ کې د امريکايي او افغان سرتيرو پر يوۀ کاروان وسله وال بريد شوى دى چې د ناټو د يوې خبرې پاڼې په وينا پکې يو امريکايي سرتيرى وژل شوى دى .

په کونړ کې چارواکي وايي چې په دغه بريد کې يو افغان سرتيرى هم وژل شوى او پنځه تنه نور يې ټپيان شوي دي .