الياس وحدت له خوست څخه

	د چارواکو په وينا د خوست ستراتيزيک اهميت ته په پام سره دغلته ډير بريدونه کيږي

د خوست والي ارسلا جمال بي بي سي ته وويل بريد کوونکي هڅه کوله چې د پوليسو يوۀ ماموريت ته ننوځي خو د ساتونکو له خوا وگرځول شو .

په دغه چاودنه کې د چارواکو په وينا يوازې يو پوليس وژل شوى دى او يو بل تن ټپي شوى دى .

وژل شوى پوليس څو ويشت کلن عارف الله نوميدۀ چې ايله اووه ورځې وړاندې د پوليس په ځواک کې په کار گمارل شوى و .

شپږ ورځې وړاندې هم په خوست کې هغه مهال ځانمرگى بريد وشو چې بريد کوونکي د ډاکټرانو په جامۀ کې د يوۀ روغتون د يوې ودانۍ د پرانيستلو پر وخت چاودنه وکړه .

په هغه پېښه کې اووه تنه نړيوال سرتيري او د روغتون يو افغان کارکوونکى ټپيان شوي و .

څه موده وړاندې چارواکو بي بي سي ته ويلي و چې د خوست ولايت ستراتيژيک اهميت ته په پام سره د دوى په وينا ترهگرو دغه ولايت په نخښه کړى دى .

له کندهار او هلمند سره جوخت خوست هغه ولايت دى چې د چارواکو په وينا پکې ترهگر بريدونه ډير کيږي .

خوست د وزيرستان له قبايلي سيمې سره نژدې پروت دى . دغلته تير کال پاکستاني حکومت له ځايي طالبانو سره د جوړ جاړي تړون لاسليک کړى و چې په نړيواله کچه يې غندنه وشوه .