الياس وحدت له خوست څخه

	امريکايي پوځ هغه سرتيري ستايلي چې د دوى په وينا يې ملکي وگړي له مرگ ژوبلې وژغورل

دغه سرتيري په هغه څه ستايل شوي چې د ځانمرگي په بوختولو يې د ملکي کسانو ژوند ژغورلى دى .

د خوست په ښار کې د سه شنبې له بريده لږ وروسته نړيوالو ځواکونو او افغان چارواکو يوازې د درو کسانو د ټپي کيدو خبره کوله .خو وسله والو طالبانو د ډيرې مرگ ژوبلې ادعا کوله .

اوس ظاهرآ له پلټنو وروسته له بگرام څخه په خپرې شوې خبر پاڼې کې ويل شوي چې په هغۀ ځانمرگي بريد کې اووه امريکايي سرتيري ټپيان شوي دي .

په افغانستان کې ورځپاڼه ليکونکي ډير کله د نړيوالو ځواکونو د مرگ ژوبلې په باب د دقيقو شميرو په موندلو کې ستونزه لري .

دغه ځواکونه تر ډيرو پلټنو وروسته په ځنډ د مرگ ژوبلې شميرې خپروي . دغه کار په عام ولس کې دا گنگوسې ډيرې کړي چې گواکې دوى د خپلې مرگ ژوبلې د پټولو هڅه کوي . دا هغه تور دى چې نړيوال ځواکونه يې ردوي .

د سه شنبې د پېښې په باب اوس په خپرې شوې خبر پاڼه کې د بريد نور داسې جزييات هم روښانه شوي چې په لومړي سر کې نه و .

د پي ار ټي د ډلې دوو سرتيرو جېسن فېټي او جاش فيليپس چې په دغه پېښه کې ټپيان شوي د خبر پاڼې په وينا امريکايي پوځ ستايلي دي . دوى دواړه ظاهرآ ځانمرگي په نخښه کړي و .

خو د ملکي کسانو د ژغورنې په نيت دغو سرتيرو ځانمرگى د مراسمو له منځه گرځولى او داسې ځاى يې ايسار کړى و چې لوى تاوان وانه وښت .

د خوست والي ارسلا جمال هم له بي بي سي سره په خبرو کې د دغو امريکايي سرتيرو ميړانه ستايلې وه او ويل يې چې که د دۀ په وينا د دوى پر ځاى عمل نه واى ډيره مرگ ژوبله به پېښه شوې وه .

له بگرام څخه په خپرې شوې خبرپاڼې کې د ټپي شوي امريکايي سرتيري له خولې ويل شوي چې تر وروستۍ شېبې يې هڅه دا وه چې ځانمرگى ونه وژني له ځکه يې د هغۀ په پښو پرله پسې ډزې کړې وې .